ആറ്റിങ്ങൽ: വാമനപുരം നദീതീര സംരക്ഷണത്തിന്റെ ഭാഗമായ നീർധാര പദ്ധതി ആറ്റിങ്ങലിൽ നഗരസഭ ചെയർപേഴ്സൻ അഡ്വ.എസ്.കുമാരി ഉദ്ഘാടനം ചെയ്തു. പദ്ധതിയുടെ ആദ്യഘട്ടത്തിൽ പച്ചംകുളം വാർഡിലെ പൊന്നറ ഏലായിലെ 2 കിലോമീറ്റർ ദൈർഘ്യമുള്ള തോടും അനുബന്ധ നീർച്ചാലുകളും വൃത്തിയാക്കി. നഗരപരിധിയിലൂടെ വാമനപുരം നദി കടന്നുപോകുന്ന തീരമേഖലകളും,​ കടവും,​ ​തോടുകളും വൃത്തിയാക്കും. നദിതീരം സംരക്ഷിക്കുന്നതിന്റെ ഭാഗമായി ആവശ്യമായ പ്രദേശങ്ങളിൽ ജൈവവേലിയും​ മഴക്കുഴിയും​ തടയണയും നിർമ്മിച്ച് മണ്ണൊലിപ്പും തടയും. മഴക്കാലത്ത് നദി കരകവിഞ്ഞൊഴുകുമ്പോഴുള്ള നാശ നഷ്ട്ടങ്ങൾ ഒഴിവാക്കാനും പദ്ധതിയിലൂടെ സാധിക്കും. പൊന്നറ ഏലായിൽ നടന്ന പരിപാടിയിൽ വൈസ് ചെയർമാൻ ജി.തുളസീധരൻ പിള്ള, സ്റ്റാൻഡിംഗ് കമ്മിറ്റി അദ്ധ്യക്ഷൻമാരായ എസ്. ഷീജ, എസ്. ഗിരിജ, കൗൺസിലർ ജിഎസ്. ബിനു, സോയിൽ കൺസർവേഷൻ ഓവർസീയർ ബിജുചന്ദ്രൻ, മേജർ ഇറിഗേഷൻ ഓവർസിയർ അനീഷ്, അയ്യങ്കാളി നഗരതൊഴിലുറപ്പ് ഓവർസിയർമാരായ ബി.എസ്. ചിന്നു, സ്മിത, നവകേരള മിഷൻ പ്രതിനിധികളായ സിന്ദുസുനിൽ, ജയരാജ് തുടങ്ങിയവർ പങ്കെടുത്തു.