വെള്ളറട: മലയോര പഞ്ചായത്തുകളുടെ ആസ്ഥാനമായ വെള്ളറട വികസനം കാത്തിരിക്കാൻ തുടങ്ങിയിട്ട് നാളുകൾ ഏറെയായി. ഇവിടുത്തെ സർക്കാർ ഓഫീസുകൾക്ക് സ്വന്തമായി ഇനിയും മന്ദിരങ്ങളില്ല. വാടകക്കെട്ടിടങ്ങളിൽ വിവിധ സ്ഥലങ്ങളിലായി പ്രവർത്തിക്കുന്ന സർക്കാർ സ്ഥാപനങ്ങളിൽ ഒരാവിശ്വത്തിനെത്തുന്ന ജനങ്ങൾ പലസ്ഥലങ്ങൾ ചുറ്റണം. വെള്ളറട ടൗൺ കേന്ദ്രീകരിച്ച് ഒരു മിനി സിവിൽ സ്റ്റേഷൻ സ്ഥാപിക്കണമെന്ന ആവശ്യത്തിന് വർഷങ്ങളുടെ പഴക്കമുണ്ട്. പ്രാഥമിക വിദ്യാഭ്യാസം കഴിഞ്ഞാൽ ഉപരിപഠനത്തിന് ആവശ്യമായ സൗകര്യമില്ലാതെ വിദ്യാർത്ഥികൾ മറ്റു സ്ഥലങ്ങളെ അഭയം പ്രാപിക്കുന്ന അവസ്ഥയാണുള്ളത്. വെള്ളറട വളരുന്നതോടൊപ്പം വെള്ളറടയുടെ പ്രാഥമിക സൗകര്യങ്ങളും വർദ്ധിപ്പിക്കാൻ അധികൃതരുടെ ഭാഗത്തുനിന്നു വേണ്ട നടപടികൾ ഉണ്ടാകാത്തത് ജനങ്ങളുടെ ദുരിതങ്ങൾക്ക് ആക്കം കൂട്ടുന്നു.

ആവശ്യങ്ങൾ ഇങ്ങനെ

1.വെള്ളറട കേന്ദ്രീകരിച്ച് ഒരു ട്രഷറിയും എക്സൈസ് ഓഫീസും ഫയർ സ്റ്റേഷനും സ്ഥാപിക്കണം

2.വെള്ളറട ആനപ്പാറയിൽ പ്രവർത്തിക്കുന്ന കമ്മ്യൂണിറ്റി ഹെൽത്ത് സെന്റർ സൂപ്പർ സ്പെഷ്യാലിറ്റി ആശുപത്രി ആക്കണം

3.സർക്കാർ ഉടമസ്ഥതയിൽ വെള്ളറട കേന്ദ്രീകരിച്ച് ഒരു ഉന്നത വിദ്യാഭ്യാസ സ്ഥാപനം തുടങ്ങണം

  രണ്ട് പ്രധാന തീർത്ഥാടന കേന്ദ്രങ്ങൾ ഈ പഞ്ചായത്ത് പ്രദേശത്തിനു സമീപമാണ്. പ്രകൃതി രമണീയമായ നിരവധി സ്ഥലങ്ങളുള്ള പ്രദേശമായതിനാൽ ഇവിടുത്തെ ടൂറിസം സാദ്ധ്യതകൾ കണക്കിലെടുത്ത് ടൂറിസത്തിനും ആവശ്യമായ പരിഗണന നൽകിയാൽ ഈ മേഖലയിൽ മലയോര ഗ്രാമം ഏറെ വളർച്ച നേടാൻ ഇടയാകുമായിരുന്നു.

 അവതാളത്തിലായ യാത്ര

മലയോരമേഖലയിലെ യാത്രാക്ലേശം പരിഹരിക്കാനായി ആരംഭിച്ച വെള്ളറട കെ.എസ്. ആർ.ടി.സി ഡിപ്പോ ഇപ്പോൾ മലയോര നിവാസികൾക്ക് യാത്രാ ദുരിതമാണ് നൽകുന്നത്. ഗ്രാമങ്ങളിലെ ഇടറോഡുകളിൽ കൂടുതൽ സർവീസുകൾ നടത്തി മലയോരനിവാസികളുടെ യാത്രാക്ലേശത്തിന് പരിഹാരം കാണുന്നതിനുവേണ്ടിയാണ് ഡിപ്പോ സ്ഥാപിച്ചതെങ്കിലും ഇന്ന് ഇട റോഡുകളിൽ ബസ് സർവീസ് അപൂർവമാണ്. രാവിലെയും വൈകുന്നേരവും വിദ്യാർത്ഥികളും സർക്കാർ ജീവനക്കാരും യാത്ര ചെയ്യാൻ വളരെയേറെ ബുദ്ധിമുട്ട് അനുഭവിക്കുകയാണ്. നിരവധി ഷെഡ്യൂളുകൾ വെട്ടിക്കുറച്ചതുകാരണം പ്രധാന റൂട്ടുകളിൽ പോലും മണിക്കൂറോളം ബസ് കാത്തുനിൽക്കണം.