നടൻ നാസറിന്റെ മകൻ അബ്ദുൾ അസൻ ഫൈസൽ വിജയ്‌യുടെ പാർട്ടിയായ തമിഴക വെട്രി കഴകത്തിൽ ചേർന്നു. നാസറിന്റെ ഭാര്യ കമീലിയ നാസറാണ് സമൂഹ മാദ്ധ്യമത്തിലൂടെ വിവരം പങ്കുവച്ചത്.

2014ലെ അപകടത്തിനുശേഷം മകന് ഓർമ്മയുള്ള ഏക വ്യക്തി വിജയ് ആണെന്നും ആ ആരാധനയോടെയാണ് വിജയ്‌യുടെ പാർട്ടിയിൽ മകൻ ചേർന്നതെന്നും കമീലിയ നാസർ സമൂഹ മാദ്ധ്യമത്തിൽ കുറിച്ചു. വിജയ്‌യുടെ കടുത്ത ആരാധകനായ ഫൈസലിന്റെ ജന്മദിനത്തിൽ നാസറിന്റെ വീട്ടിൽ എത്തി വിജയ് സർപ്രൈസ് നൽകിയത് വാർത്തകളിൽ ഇടം നേടിയിരുന്നു.

2014 മേയ് 22 ന് ആണ് അബ്ദുൾ അസൻ ഫൈസലിന് അപകടം സംഭവിക്കുന്നത്. സുഹൃത്തുക്കൾക്കൊപ്പം യാത്ര ചെയ്യുകയായിരുന്ന ഫൈസലിന്റെ കാർ ലോറിയുമായി കൂട്ടിയിടിക്കുകയായിരുന്നു,​

മൂന്നു പേർ സംഭവസ്ഥലത്തു വച്ചുതന്നെ മരിച്ചു. ഫൈസലും മറ്റൊരു സുഹൃത്തും മാത്രമാണ് രക്ഷപ്പെട്ടത്. ഈ മാസം 8 നാണ് വിജയ് തന്റെ പാർട്ടിയായ തമിഴ് വെട്രി കഴകത്തിലേക്ക് അംഗങ്ങളെ ചേർക്കുന്നതിന് ആപ്ലിക്കേഷൻ ആരംഭിച്ചത്. ആദ്യം അംഗത്വമെടുത്തത് വിജയ് തന്നെയാണ്.