തിരുവനന്തപുരം: കരമന തെലുങ്കുചെട്ടി തെരുവിലെ പൊങ്കാല മഹോത്സവ മേളത്തിന് എൻ.ഡി.എ സ്ഥാനാർത്ഥി രാജീവ് ചന്ദ്രശേഖറുമെത്തി. തെലുങ്ക് വംശജർ കൂടുതലായി പാർക്കുന്ന സ്ഥലമാണിത്. കോട്ടയ്‌ക്കകത്ത് പ്രിയദർശിനി ഹാളിൽ രാജസ്ഥാൻ അസോസിയേഷൻ സംഘടിപ്പിച്ച ഹോളി ആഘോഷത്തിലും പങ്കെടുത്ത് സ്ഥാനാർത്ഥി പ്രചാരണം വർണാഭമാക്കി.

തെലുങ്ക് വംശജരുടെ നേതൃത്വത്തിൽ നടക്കുന്ന ശ്രീ ഏക മഹേശ്വര കാമാക്ഷി അമ്മൻ ക്ഷേത്രത്തിലെ തൃക്കല്യാണ കൊട മഹോത്സവത്തിലെ പൊങ്കാല മഹോത്സവത്തിനെത്തിയപ്പോൾ അഞ്ഞൂറോളം വരുന്ന കുടുംബാംഗങ്ങൾ വാദ്യമേളങ്ങളുടെ അകമ്പടിയോടെയാണ് സ്ഥാനാർത്ഥിയെ വരവേറ്റത്. കോട്ടയ്‌ക്കകത്ത് പ്രിയദർശിനി ഹാളിലെ രാജസ്ഥാൻ അസോസിയേഷന്റെ ഹോളി ആഘോഷത്തിലേക്ക് കടന്നുവന്ന സ്ഥാനാർത്ഥിയെ നിറങ്ങൾ വാരി വിതറിയാണ് സംഘാടകർ എതിരേറ്റത്. അസോസിയേഷൻ പ്രസിഡന്റ് പ്രബുധാൻ രാജീവ് ചന്ദ്രശേഖറിന്റ മുഖത്ത് ചായം തേച്ച് പരമ്പരാഗത തലപ്പാവണിയിച്ചു. ചുറ്റുംകൂടിയ കുട്ടികൾക്ക് രാജീവ് ചന്ദ്രശേഖർ മധുരം നൽകി.