കടയ്ക്കാവൂർ: പഴഞ്ചിറ കുളത്തിന് സംരക്ഷണ വേലിയില്ലാത്തതിനാൽ അപകടഭീതിയിൽ യാത്രക്കാർ. പള്ളിമുക്ക് ആറ്റിങ്ങൽ റോഡിൽ പഴഞ്ചിറ ഭാഗത്താണ് ഈ കുളം. ഏകദേശം ഒരേക്കറോളം വിസ്തൃതിയിലുള്ള കുളം പ്രദേശത്തെ നെൽക്കൃഷിക്കുള്ള ജലസേചനത്തിനായി രാജവാഴ്ചക്കാലത്ത് നിർമ്മിച്ചതാണ്.

റോഡിൽ നിന്ന് ഏകദേശം ഇരുപതടിയോളം താഴ്ചയിലാണ് കുളം.ഇടുങ്ങിയ റോഡിൽ കയറ്റിറക്കവും വളവുമാണ്.ഇറക്കം ഇറങ്ങി വരുന്ന വാഹനങ്ങൾ കുളത്തിന്റെ ഭാഗത്തുവച്ച് എതിരെ വരുന്ന വാഹനങ്ങൾക്ക് സൈഡ് കൊടുക്കുമ്പോൾ അല്പം ശ്രദ്ധകുറവുണ്ടായാൽ വാഹനം കുളത്തിലേക്ക് മറിയാൻ സാദ്ധ്യതയുണ്ട്.കുളത്തിന്റെ ഭാഗത്ത്‌ റോഡരികിൽ വളർന്നു നിൽക്കുന്ന കുറ്റിച്ചെടികൾ കാരണം സ്ഥലപരിചയമില്ലാത്ത ഡ്രൈവർക്ക് റോഡിന്റെ അവസ്ഥ മനസിലാക്കാൻ കഴിയില്ല. രാത്രികാലങ്ങളിൽ മതിയായ വെളിച്ചമില്ലായ്മയും ഈ ഭാഗത്തെ അപകടസാദ്ധ്യത വർദ്ധിപ്പിക്കുന്നു. മഴക്കാലം ആരംഭിച്ചാൽ റോഡിലേക്ക് പുല്ല് വളർന്ന് കയറുന്നത് അപകടസാദ്ധ്യത വർദ്ധിപ്പിക്കും.കുളത്തിന് എതിർവശവും ഏകദേശം ഇരുപതടിയോളം താഴ്ചയുള്ള ഭാഗമാണ്. ഇവിടെയും സംരക്ഷണവേലിയില്ല.അടിയന്തരമായി ഇരുവശത്തും സംരക്ഷണവേലികൾ നിർമ്മിക്കണമെന്നതാണ് നാട്ടുകാരുടെ ആവശ്യം.