അമ്പലപ്പുഴ: ആലപ്പുഴ മെഡിക്കൽ കോളേജ് ആശുപത്രിയിൽ ചികിത്സയിലായിരുന്ന യുവാവ് കുളിമുറിയിൽ ജീവനൊടുക്കി. പൂച്ചാക്കൽ പാണാവള്ളി പഞ്ചായത്ത് 15-ാം വാർഡ് വൈശ്യം പറമ്പിൽ അനിൽകുമാറിനെ (52)യാണ് മരിച്ച നിലയിൽ കണ്ടെത്തിയത്. ഇന്നലെ രാവിലെ വാർഡിലെ കുളിമുറി അടച്ചിട്ടിരിക്കുന്നത് കണ്ട് സുരക്ഷാഉദ്യോഗസ്ഥർ എത്തി തുറന്നപ്പോഴാണ് കൈയിലെ ഞരമ്പ് മുറിച്ച് രക്തം വാർന്ന നിലയിൽ അനിൽകുമാറിനെ കണ്ടത്. തുടർന്ന് മരണം സ്ഥിരീകരിക്കുകയായിരുന്നു. അമ്പലപ്പുഴ പൊലീസ് എത്തി ഇൻക്വസ്റ്റ് പൂർത്തിയ മൃതദേഹം,​ പോസ്റ്റുമാർട്ടത്തിന് ശേഷം ബന്ധുക്കൾക്ക് വിട്ടുനൽകി.

കഴിഞ്ഞ 26ന് ആണ് കടുത്ത പ്രമേഹത്തെ തുടർന്ന് അനിൽകുമാറിനെ പത്താം വാർഡിൽ പ്രവേശിപ്പിച്ചത്. ശരീരമാസകലം വൃണവും രൂപപ്പെട്ടിരുന്നു. തിങ്കളാഴ്ച രാവിലെ മുതൽ അനിൽകുമാറിനെ വാർഡിൽ നിന്ന് കാണാതിരുന്നതിനെ തുടർന്ന് ബന്ധുക്കൾ അമ്പലപ്പുഴ പൊലീസിൽ പരാതി നൽകിയിരുന്നു. പൊലീസ് തെരച്ചിൽ തുടരുന്നതിനിടെയാണ് ജീവനൊടുക്കിയ നിലയിൽ കണ്ടെത്തിയത്. ഭാര്യ: അമ്പിളി. മക്കൾ: അഞ്ജു, അഖില, ഗൗരി.