ചാരുംമൂട് : കൊല്ലം - തേനി ദേശീയ പാതയി​ൽ താമരക്കുളം ചാവടി ജംഗ്ഷനിൽ വാട്ടർ അതോറിറ്റിയുടെ കുടിവെള്ള പൈപ്പ് ലൈൻ പൊട്ടി വെള്ളം പാഴാകാൻ തുടങ്ങിയിട്ട് അഞ്ച് മാസത്തിലധികമായി. ലക്ഷക്കണക്കിന് ലിറ്റർ വെള്ളമാണ് ദിനംപ്രതി പാഴാകുന്നത് . വെള്ളം ഒഴുകി സമീപപ്രദേശത്തെ പുരയിടങ്ങളിൽ വെള്ളക്കെട്ടുകളും രൂപപ്പെട്ടിട്ടുണ്ട്. ഈ ലൈനിൽ നിന്നും കണക്ഷൻ എടുത്ത ജൽജീവൻ പദ്ധതിയുടെ നിരവധി ഉപഭോക്താക്കൾക്ക് കുടിവെള്ളം മുട്ടി. വാർഡ് മെമ്പർ ആർ.ദീപ നിരവധി തവണ മാവേലിക്കര വാട്ടർ അതോറിറ്റിയിൽ പരാതി നൽകിയെങ്കിലും ഹൈവേ അതോറിട്ടി​യുടെ അനുമതി​ വേണമെന്ന കാരണം പറഞ്ഞ് പൈപ്പ് മാറുന്ന ജഓലി​കൾ നീണ്ടുപോവുകയാണ്. എത്രയും പെട്ടെന്ന് പൈപ്പ് ലൈന്റെ തകരാർ പരിഹരിച്ചില്ലെങ്കിൽ സമരം നടത്താൻ തയ്യാറെടുക്കുകയാണ് പ്രദേശവാസികൾ.