ഹരിപ്പാട്: ആടുജീവിതം കഥയിലെ ജീവിക്കുന്ന കഥാപാത്രം നജീബിന് സ്നേഹ സമ്മാനവുമായി ശില്പിയും ചിത്രകാരനുമായ ഡാവിഞ്ചി സുരേഷ് എത്തി. ശനിയാഴ്ച രാവിലെ നജീബിന്റെ വീട്ടിലെത്തിയാണ് സ്നേഹ ശില്പം സമ്മാനിച്ചത്. ആടുജീവിതം നോവലിന്റെ കവർപേജിനെയും നോവലിൽ നിന്ന് വെള്ളിത്തത്തിരയിലേക്ക് എത്തിയതിനെയും ആസ്പദമാക്കി നജീബിന്റെ മുഖവും ഉൾപ്പെടുത്തി തയ്യാറാക്കിയ, ഈ ശില്പം സിനിമ റിലീസാവുന്നതിന് ഒരാഴ്ച മുൻപേ നിർമ്മിച്ചതാണ്. ഇരുമ്പ് കമ്പികളും തകിട് ഷീറ്റുകളും ഫൈബർ മെറ്റീരിയലും ഉപയോഗിച്ച് നാലടിയോളം ഉയരത്തിലാണ് ശില്പം നിർമിച്ചത്. സമൂഹ മാദ്ധ്യമങ്ങളിലൂടെ ഇത് ജനശ്രദ്ധയാകർഷിച്ചിരുന്നു. കലാകാരന്മാരുടെ കൂട്ടായ്മയായ എക്‌സോട്ടിക് ഡ്രീംസിലെ കലാകാരന്മാരായ കലേഷ് പൊന്നപ്പൻ, രാകേഷ് പള്ളത്ത്,റിയാസ് മാടവന, ലതീഷ് സോമൻ, മനോജ്‌ ഗോപാലകൃഷ്ണൻ, ഗിരീഷ് നടുവട്ടം, ജാഫർ ഇല്ലെത്ത്, സിംബാദ്, മൂവിംഗ് മിറാക്കിൾസ് ടീം അംഗങ്ങളായ സി.എസ്.സന്ദീപ്, പി.എസ്. സന്ദീപ്, ബിജു, ജിത്തു,കിച്ചു, സിവിൻ എന്നിവരും സുരേഷിനോടൊപ്പം ഉണ്ടായിരുന്നു. ശില്പത്തിനൊപ്പം കലാകാരന്മാരായ രിയാസ് മാടവന, കലേഷ് പൊന്നപ്പൻ വരച്ച ചിത്രങ്ങളും സമ്മാനിച്ചു.