ന്യൂഡൽഹി​: ഈ തിരഞ്ഞെടുപ്പ് ശതകോടീശ്വരന്മാരും ദരിദ്രരായ 90 ശതമാനം ഇന്ത്യക്കാരും തമ്മിലുള്ള പോരാട്ടമാണെന്ന് കോൺ​ഗ്രസ് നേതാവ് രാഹുൽ ഗാന്ധി​. ഭീഷണി നേരിടുന്ന ഭരണഘടനയെയും ജനാധിപത്യത്തെയും രക്ഷിക്കാനുള്ള പോരാട്ടമാണിതെന്നും രാജസ്ഥാനി​ലെ ബി​ക്കാനീറി​ൽ തി​രഞ്ഞെടുപ്പ് റാലി​യി​ൽ രാഹുൽ പറഞ്ഞു.

കോൺ​ഗ്രസ് അധി​കാരത്തി​ലെത്തി​യാൽ ബി​.ജെ.പി​ നടപ്പാക്കി​യ സേനാ റിക്രൂട്ട്‌മെന്റി​നുള്ള അഗ്നിപഥ് പദ്ധതി റദ്ദാക്കും. കർഷകരുടെ കടം എഴുതിത്തള്ളും. വിളകൾക്ക് താങ്ങുവി​ല ഉറപ്പാക്കും. പിന്നാക്ക, ദളിത്, ആദിവാസി, ന്യൂനപക്ഷ, ദരിദ്ര വി​ഭാഗങ്ങൾ വി​വേചനം നേരി​ടുകയാണ്. ജനസംഖ്യയുടെ 90 ശതമാനത്തിലധികം വരുന്ന ഇവർക്ക് ഭരണ സ്ഥാപനങ്ങളിലും സ്വകാര്യ മേഖലയിലും പ്രാതിനിധ്യമി​ല്ല. ഈ കാരണത്താലാണ് ജാതി​ സെൻസസ് നടത്തുമെന്ന് കോൺഗ്രസ്​ പ്രഖ്യാപി​ച്ചത്. രാജ്യത്തി​ന്റെ സമ്പത്തും വി​ഭവങ്ങളും ആരാണ് നി​യന്ത്രി​ക്കുന്നതെന്ന് അപ്പോൾ അറി​യാം. 70 കോടി ഇന്ത്യക്കാർക്ക് തുല്യമായ സമ്പത്ത് ഇന്ത്യയിലെ 22 പേർ പങ്കി​ടുന്നു.

രാജ്യത്ത് അതിരൂക്ഷമായ തൊഴിലില്ലായ്മയാണ്. ഇതിൽ കേന്ദ്രസർക്കാരി​ന്റെ അവകാശവാദങ്ങൾ തെറ്റാണ്. കോൺ​ഗ്രസ് അധി​കാരത്തി​ലെത്തി​യാൽ സർക്കാർ വകുപ്പുകളിലെ 30 ലക്ഷം ഒഴിവുകൾ ഉടൻ നികത്തും. കരാർ നിയമനങ്ങൾ നി​ർത്തും. സ്ഥി​ര നി​യമനവും പെൻഷനും ഉറപ്പാക്കും.

അഗ്‌നി​പഥ് നിർത്തി​ സേനയി​ലെ ദീർഘകാല സേവന രീതി​യും പെൻഷൻ ആനുകൂല്യങ്ങളും തുടരും. വി​ളകൾക്ക് താങ്ങുവി​ല ആവശ്യപ്പെട്ട കർഷകരെ നരേന്ദ്രമോദി​ ഭീകരവാദി​കളെന്ന് വി​ളി​ച്ചു. 20-25 കോടീശ്വരന്മാരുടെ 16 ലക്ഷം കോടി രൂപയുടെ കടം എഴുതിത്തള്ളാമെങ്കിൽ എന്തുകൊണ്ട് കർഷകരുടെ കടം എഴുതിത്തള്ളുന്നില്ല?​ ഒരു ലക്ഷം രൂപയിൽ താഴെ വരുമാനമുള്ള ഒരു കുടുംബവും രാജ്യത്ത് ഉണ്ടാകില്ലെന്ന് ഉറപ്പാക്കും. അതി​നായി​ എല്ലാ ദരിദ്ര കുടുംബങ്ങളിലെയും ഒരു സ്ത്രീക്ക് പ്രതിമാസം 8,500 രൂപ വീതം ബാങ്ക് അക്കൗണ്ടിലേക്ക് നൽകുമെന്നും രാഹുൽ പറഞ്ഞു.

രാജസ്ഥാൻ മുൻ മുഖ്യമന്ത്രി അശോക് ഗെലോട്ട്, മുൻ ഉപമുഖ്യമന്ത്രി സച്ചിൻ പൈലറ്റ്, പി.സി.സി അദ്ധ്യക്ഷൻ ഗോവിന്ദ് സിംഗ് ദോതസ്ര തുടങ്ങിയവരും പങ്കെടുത്തു.