കൊച്ചി: മദ്യപിക്കുന്നതിന് പണം നൽകാതിരുന്നതിന്റെ വൈരാഗ്യത്തിൽ മട്ടാഞ്ചേരി സ്വദേശിയെ മർദ്ദി​ച്ച് കൊലപ്പെടുത്താൻ ശ്രമിച്ച കേസി​ൽ മട്ടാഞ്ചേരി പനയപ്പിള്ളി സ്വദേശി ജിനു കൃഷ്ണൻ (49) മട്ടാഞ്ചേരി പൊലീസിന്റെ പിടിയിലായി​. കൂവപ്പാടത്ത് താമസിക്കുന്ന ശെൽവനാണ് ആക്രമണത്തിൽ ഗുരുതരമായി പരിക്കേറ്റത്. മദ്യപിക്കുന്നതിന് പണം കൊടുക്കാതിരുന്നതിന്റെ വിരോധത്തിൽ കൂവപ്പാടം മാർക്കറ്റിനുള്ളിൽ ഇരുമ്പ് വടികൊണ്ട് ശെൽവനെ ക്രൂരമായി മർദ്ദി​ക്കുകയായിരുന്നു. ഗുരുതരമായി പരിക്കേറ്റ ശെൽവൻ കളമശേരി മെഡിക്കൽ കോളേജിൽ ചികിത്സയിലാണ്. സംഭവത്തിന് ശേഷം ഒളിവിൽ പോയ പ്രതി കൂവപ്പാടത്ത് ഉണ്ടെന്ന രഹസ്യവിവരത്തിന്റെ അടിസ്ഥാനത്തിൽ പിടികൂടുകയായിരുന്നു.