അങ്കമാലി: അങ്കമാലി നഗരസഭ ഇരുപത്തിനാലാം വാർഡിൽ കിഴക്കേ പള്ളിക്ക് സമീപം ആളൊഴിഞ്ഞ പറമ്പുകളിൽ കുറുനരികൾ കൂട്ടമായി വിഹരിക്കുന്നത് നാട്ടുകാ‌ർക്ക് തലവേദനയാകുന്നു. കോഴികളെയും വളർത്തുമൃഗങ്ങളെയും കുറുനരികൾ പിടിക്കുന്നത് സ്ഥിര സംഭവമാണ്. കൂട്ടം തെറ്റി വന്ന ഒരു കുറുനരി കഴിഞ്ഞ ദിവസം റോസിലി ബാബുവിന്റെ പറമ്പിലെത്തിയതോടെ വാർഡ് കൗൺസിലർ ലക്സി ജോയിയുടെ നേതൃത്വത്തിൽ ഫോറസ്റ്റ് അധികൃതരെ വിവരമറിയിക്കുകയും അവർ അതിനെ കൂട്ടിലാക്കി കൊണ്ടുപോകുകയും ചെയ്തു. ഫോറസ്റ്റ് സെക്ഷൻ ഓഫീസർ ജെ. ബി. സാബു, ദ്രുതകർമ്മ സേനാംഗങ്ങളായ കെ.പി.വർഗീസ്, പി.ജെ വിൽസൺ എന്നിവർ നേതൃത്വം നൽകി. കുറുനരി കൂട്ടങ്ങളെ നാട്ടിൽ നിന്നും ഒഴിവാക്കുന്നതിന് നടപടികൾ സ്വീകരിക്കണമെന്ന് ഫോറസ്റ്റ് അധികൃതരോട് കൗൺസിലർ ലക്സി ആവശ്യപ്പെട്ടു.