മൂവാറ്റുപുഴ: മൂവാറ്റുപുഴ സ്പെഷ്യൽ സബ് ജയിലിലേക്ക് പുറമെനിന്ന് മദ്യക്കുപ്പി ഉൾപ്പെടെയുള്ള വസ്തുക്കളടങ്ങിയ പായ്ക്കറ്റുകൾ എറിഞ്ഞുകൊടുത്ത കേസിൽ ഒരാൾ പിടിയിൽ. തൃക്കാക്കര എച്ച്.എം.ടി കോളനി കുന്നത്ത് കൃഷ്ണകൃപവീട്ടിൽ വിനീതിനെയാണ് (32) പൊലീസ് പിടികൂടിയത്.

ഒരു പൊതിയിൽ മദ്യവും മിനറൽ വാട്ടറും അടങ്ങുന്ന ഓരോകുപ്പിയും മറ്റൊരു പൊതിയിൽ പതിനഞ്ച് കൂട് ബീഡിയും മൂന്നാമത്തെ പൊതിയിൽ ഒരു ലാമ്പും 7 പായ്ക്കറ്റ് ചെമ്മീൻ റോസ്റ്റുമാണുണ്ടായിരുന്നത്. ജയിൽവളപ്പിന് വെളിയിൽനിന്ന് കോമ്പൗണ്ട് വാളിന് മുകളിൽക്കൂടി അകത്തേക്ക് വലിച്ചെറിയുകയായിരുന്നു. ബുധനാഴ്ച ഉച്ചയ്ക്ക് ഒന്നോടെ അടുക്കളയുടെ പിൻഭാഗത്താണ് പൊതികൾ വന്നുവീണത്.

ജയിൽ സൂപ്രണ്ടിന്റെ പരാതിയെത്തുടർന്ന് ഇൻസ്പെക്ടർ ബി.കെ. അരുൺ, സബ് ഇൻസ്പെക്ടർ വിഷ്ണുരാജു എന്നിവർ ചേർന്നാണ് പ്രതിയെ പിടികൂടിയത്.