ചോറ്റാനിക്കര: യെമൻ പൗരനെ കൊലപ്പെടുത്തിയ കേസിൽ വധശിക്ഷയ്ക്ക് വിധിക്കപ്പെട്ട് സനയിലെ ജയിലിൽ കഴിയുന്ന നിമിഷ പ്രിയയുടെ മോചനം സാദ്ധ്യമാകുമെന്നാണ് പ്രതീക്ഷയെന്ന് അമ്മ പ്രേമകുമാരി​ മാദ്ധ്യമങ്ങളോട് പറഞ്ഞു.

ചർച്ചകൾക്കായി ഇന്ന് യെമനിലേക്ക് തിരിക്കും മുമ്പ്,​ പ്രേമകുമാരി​ക്ക് വേണ്ടി​ ഡൽഹി ഹൈക്കോടതിയിൽ കേസ് നടത്തുന്ന അഭിഭാഷകൻ കെ.ആർ.സുഭാഷ് ചന്ദ്രനൊപ്പമാണ് മാദ്ധ്യമങ്ങളെ കണ്ടത്.

നിമിഷപ്രിയയുമായി​ ആഴ്ചയിൽ ഒന്നോ രണ്ടോ വട്ടം ഫോണി​ൽ ബന്ധപ്പെടാറുണ്ടെന്നും നിമിഷ ജയിലിൽ ആതുര സേവനം ചെയ്യുന്നതിനാൽ യെമൻ ഭരണകൂടം വധശിക്ഷ നടപ്പാക്കില്ലെന്നാണ് പ്രതീക്ഷയെന്നും പ്രേമകുമാരി​ പറഞ്ഞു. ഗോത്ര തലവന്മാരുമായി പലവട്ടം നടന്ന ചർച്ചയിൽ നിമിഷയ്ക്ക് അനുകൂലമായ സമീപനം സ്വീകരിക്കാമെന്ന് ധാരണയായി​ട്ടുണ്ട്. തുക സംബന്ധിച്ചാണ് തീരുമാനം ഉണ്ടാകേണ്ടത്.

ഇന്ന് കൊച്ചിയിൽ നിന്ന് മുംബയ് വഴി​​ യെമനിലെ ഏഡെൻ അന്താരാഷ്ട്ര വിമാനത്താവളത്തിലാണ് എത്തുക. അവിടെ നിന്ന് റോഡുമാർഗം സനയിലെത്തി​ ജയിലിൽ നിമിഷപ്രിയയെ സന്ദർശിക്കാമെന്നാണ് പ്രതീക്ഷ. യെമനി​ൽ നി​ന്ന് ഇന്ത്യയി​ലേക്ക് യാത്രാവി​മാന സർവീസി​ല്ല. മെഡി​ക്കൽ ആവശ്യങ്ങൾക്കും മറ്റും എത്തുന്ന വി​മാനങ്ങൾ മാത്രമാണ് ആശ്രയം. അത്തരമൊരു വി​മാനത്തി​ലാണ് പ്രേമകുമാരി​ മുംബയി​ൽ നി​ന്ന് ഇന്ന് വൈകിട്ട് അഞ്ചിന് യാത്രതി​രി​ക്കുക.

ആഭ്യന്തരയുദ്ധം രൂക്ഷമായ യെമനിലെ സർക്കാരുമായി ഇന്ത്യക്ക് നയതന്ത്ര ബന്ധമില്ലാത്തതി​നാൽ സേവ് നിമിഷ പ്രിയ ആക്‌ഷൻ കൗൺസിലാണ് യെമനിലെ ചർച്ചകൾക്കുള്ള ക്രമീകരണങ്ങൾ നടത്തുന്നത്. എം.എ.യൂസഫലി​ ഉൾപ്പടെ നി​രവധി​ പേരുടെ സഹായമുണ്ട്. നിമിഷ പ്രിയയ്ക്ക് വേണ്ടി കേന്ദ്രസർക്കാർ മനുഷ്യത്വപരമായ സമീപനം സ്വീകരിച്ചില്ലെന്നും കേന്ദ്ര വി​ദേശകാര്യ സഹമന്ത്രി വി.മുരളീധരൻ വാഗ്ദാനങ്ങൾ നൽകിയെങ്കി​​ലും കോടതിയിൽ മറ്റൊരു നിലപാടാണ് സർക്കാർ സ്വീകരിച്ചതെന്നും പ്രേമകുമാരി​ ആരോപിച്ചു.

യെമൻ പൗരൻ തലാൽ അബ്ദുമഹ്ദി 2017ൽ കൊല്ലപ്പെട്ട കേസിൽ വധശിക്ഷയിൽ ഇളവു നൽകണമെന്ന നിമിഷപ്രിയയുടെ ആവശ്യം നേരത്തെ യെമൻ കോടതി തള്ളിയിരുന്നു.