പെരുമ്പാവൂർ: പുഴയിൽ കുളിക്കാനിറങ്ങിയ യുവതി​ കാൽ വഴുതി 20 അടി താഴ്ച്ചയുള്ള കയത്തിൽ അകപ്പെട്ട് മുങ്ങി മരി​ച്ചു.

കൂവപ്പടി ആലാട്ടുചിറ അഭയാരണ്യത്തിനുസമീപം പെരിയാറിൻ്റെ കൈവരിയായ ചെട്ടിനട പനങ്കുരുത്തോട്ടം പുഴയിൽ കുളിക്കാനിറങ്ങിയ ചെങ്ങന്നൂർ എടനാട് മായാലിൽ തുണ്ടിയിൽ വീട്ടിൽ തോമസിൻ്റെ മകൾ ജോമോൾ (25) ആണ് മരി​ച്ചത്.

ഇന്നലെ ഉച്ചയ്ക്ക് പതി​നൊന്നരയോടെ നാലു കൂട്ടുകാരികളുമൊത്ത് കുളിക്കാനിറങ്ങിയ ജോമോൾ കുളി കഴിഞ്ഞ് കരക്കു കയറിയ ശേഷം ഒന്നൂകൂടി വെള്ളത്തിൽ ഇറങ്ങാം എന്നു പറഞ്ഞ് മൂന്നു കൂട്ടുകാരി​കൾക്കൊപ്പം വീണ്ടും പുഴയിൽ ഇറങ്ങുകയായി​രുന്നു. അതിനിടെയാണ് കാലുതെറ്റി കയത്തിൽ അകപ്പെട്ടത്. കൂട്ടുകാരികൾ ബഹളം വച്ചതിനെത്തുടർന്ന് നാട്ടുകാർ ഫയർഫോഴ്സി​ൽ വി​വരം അറി​യി​ച്ചു. പെരുമ്പാവൂരിൽ നി​ന്നുമെത്തി​യ ഫയർഫോഴ്സും കോടനാട് പൊലീസും കോതമംഗലത്തുനിന്നും എത്തിയ സ്കൂബ ടീമും നാട്ടുകാരും ചേർന്ന് തെരച്ചിൽ നടത്തി ജോമോളെ മുങ്ങിയെടുത്തെങ്കിലും അപ്പോഴേക്കും മരിച്ചിരുന്നു. മൃതദേഹം പെരുമ്പാവൂർ താലൂക്ക് ആശുപത്രിയിലേക്ക് മാറ്റി. ബംഗളൂരുവി​ൽ ഒരുമിച്ചു ജോലി ചെയ്യുന്ന കൂട്ടുകാരി സ്വാതി​യുടെ വിവാഹ നിശ്ചയ ചടങ്ങിൽ പങ്കെടുക്കുവാനായി രണ്ടു ദിവസം മുമ്പാണ് ജോമോളും മറ്റു മൂന്നു കൂട്ടുകാരികളും ആലാട്ടുചിറ നെടുമ്പിള്ളിൽ വീട്ടിൽ അജിത് കുമാറിൻ്റെ വീട്ടിലെത്തിയത്. അജിത്ത് കുമാറിൻ്റെ മകളാണ് സ്വാതി​.

സംസ്കാരം പിന്നീട്. മാതാവ്: എലിസബത്ത്, സഹോദരൻ: ജോയൽ.

പെരുമ്പാവൂർ ഫയർ സ്റ്റേഷൻ ഓഫീസർ ടി.കെ. സുരേഷിൻ്റെ നേതൃത്വത്തിൽ ഗ്രേഡ് സ്റ്റേഷൻ ഓഫീസർ പി.എൻ. സുബ്രഹ്മണ്യൻ, പി.എസ് ഉമേഷ് , സുധീർ, പി.എം.ഷാജു, ജോസഫ്., പി എസ് ഉഷ , എന്നിവരാണ് രക്ഷാപ്രവർത്തനത്തിൽ പങ്കെടുത്തത്.