• കടയിരുപ്പ് ശ്രീനാരായണ ഗുരുകുലം കോളേജിൽ ഐ.ഡി.ഇ ബൂട്ട് ക്യാമ്പിന് തുടക്കം
കോലഞ്ചേരി: വൃക്ഷലതാദികളുടെ ഇലയുടെയോ പൂവിന്റെയോ ചിത്രം നൽകിയാൽ ചെടി ഏതെന്നും ഔഷധഗുണങ്ങൾ എന്തൊക്കെയെന്നുമുള്ള വിവരങ്ങൾ ലഭ്യമാകുന്ന ആപ്പ്... ഉള്ളിത്തൊലി മുതൽ പഴത്തൊലി വരെയുള്ള ഭക്ഷണാവശിഷ്ടങ്ങൾ ഉപയോഗിച്ച് നിർമ്മിക്കുന്ന സ്‌പൂൺ, ഫോർക്ക്, കപ്പുകൾ... കൗതുകമുണർത്തുന്ന കണ്ടെത്തലുകളുമായി ഇന്ത്യയുടെ വിവിധ ഭാഗങ്ങളിൽ നിന്നുള്ള വിദ്യാർത്ഥികളുടെ സംഗമത്തിന് കടയിരുപ്പ് ശ്രീ നാരായണ ഗുരുകുലം കോളേജ് വേദിയായി.
കാൽനൂറ്റാണ്ടിനിടെ കേരളം ആതിഥ്യം വഹിച്ച വിദ്യാർത്ഥി ഇന്നൊവേറ്റർമാരുടെ ആദ്യ ഐ.ഡി.ഇ ബൂട്ട് ക്യാമ്പായിരുന്നു ഇത്.
സ്മാർട്ട് ഇന്ത്യ ഹാക്കത്തൺ മത്സരങ്ങളിൽ ഫൈനലിസ്റ്റുകളായ 175 പ്രതിഭകളും ലഡാക്ക്, ജമ്മു കാശ്മീർ എന്നിവിടങ്ങളിൽ നിന്നുള്ള 50 വിദ്യാർത്ഥികളും അടൽ ടിങ്കറിംഗ് ലാബിൽ നിന്നുള്ള 20 സ്‌കൂൾ വിദ്യാർത്ഥികളും അദ്ധ്യാപകരും ഉൾപ്പെടെ 300ലേറെപ്പേർ ക്യാമ്പിൽ പങ്കെടുക്കുന്നു.
ഇന്നൊവേഷൻ ഡിസൈനും സംരംഭകത്വ കഴിവുകളും പരിപോഷിപ്പിക്കാൻ ലക്ഷ്യമിടുന്ന ക്യാമ്പിന്റെ മൂന്നാം ഘട്ടത്തിനാണ് കോളേജ് ആതിഥ്യമരുളുന്നത്. കേന്ദ്ര വിദ്യാഭ്യാസ മന്ത്റാലയത്തിന്റെ ഇന്നൊവേഷൻ സെൽ, എ.ഐ.സി.ടി.ഇ, വാദ്ധ്വാനി ഫൗണ്ടേഷൻ എന്നിവയുടെ സഹകരണത്തോടെയാണ് ബൂട്ട് ക്യാമ്പ് എല്ലാ വർഷവും സംഘടിപ്പിക്കുക. പ്രതിഭകളുടെ ആശയങ്ങളും കണ്ടുപിടിത്തങ്ങളും നിർമ്മിതികളും വിവിധ മേഖലയിലുള്ള വിദഗ്ദ്ധരുടെ മുന്നിൽ സമാപനദിനമായ മേയ് മൂന്നിന് അവതരിപ്പിക്കും.
കൊച്ചി മെട്രോ റെയിൽ എം.ഡി ലോക്‌നാഥ് ബെഹ്റ ക്യാമ്പ് ഉദ്ഘാടനം ചെയ്തു. ഗുരുകുലം ട്രസ്റ്റ് സെക്രട്ടറി ആർ. അനിലൻ അദ്ധ്യക്ഷനായി. എ.ഐ.സി.ടി.ഇ അഡ്വൈസർ രമേഷ് ഉണ്ണികൃഷ്ണൻ മുഖ്യപ്രഭാഷണം നടത്തി. എ.ഐ.സി.ടി.ഇ നോഡൽ സെന്റർ ഹെഡ് സരിം മോയിൻ, കോളേജ് മാനേജർ വി. മോഹനൻ, ട്രഷറർ കെ.എൻ. ഗോപാലകൃഷ്ണൻ, സി.ഇ.ഒ ഡോ.ഇ.പി. യശോധരൻ, പ്രിൻസിപ്പൽ ഡോ. എസ്. ജോസ്, പ്രോഗ്രാം കോഓർഡിനേറ്റർ ഡോ. പ്രതിഭ വർഗീസ് എന്നിവർ സംസാരിച്ചു.