പറവൂർ: സിഗ്നൽ തകരാറുമൂലം അപകടം പതിവായ ചേന്ദമംഗലം കവലയിലെ സിഗ്നൽ ലൈറ്റുകൾ പ്രവർത്തനക്ഷമമാക്കി. കെൽട്രോണിലെ ടെക്നിക്കൽ വിഭാഗമാണ് തിങ്കളാഴ്ച വൈകിട്ടോടെ തകരാർ പരിഹരിച്ചത്. നഗരത്തിലെ ഏറ്റവും തിരക്കേറിയ ചേന്ദമംഗലം കവലയിൽ സ്ഥാപിച്ചിട്ടുള്ള സിഗ്നൽ സിസ്റ്റത്തിന് വർഷങ്ങളുടെ പഴക്കമുള്ളതിനാൽ ലൈറ്റുകൾ പലതും തകരാറിലായിരുന്നു. ഇതിനാൽ അപകടങ്ങളും ഗതാഗതക്കുരുക്കും പതിവായിരുന്നു. നഗരത്തിലെ രണ്ട് വ്യാപാര സ്ഥാപനങ്ങളുടെ സാമ്പത്തിക സഹായത്തോടെയാണ് സിഗ്നൽ ലൈറ്റുകൾ നന്നാക്കിയത്. പറവൂർ നഗരസഭയ്ക്ക് സിഗ്നൽ ലൈറ്റുകൾ നന്നാക്കാനുള്ള തുക ചെലവഴിക്കാൻ നിയമപരമായി സാധിക്കാത്ത സാഹചര്യത്തിലാണ് സ്ഥാപനങ്ങളുടെ സഹായം തേടിയത്. പൊതുമരാമത്ത് വകുപ്പ് സ്ഥാപിച്ചിട്ടുള്ള സിഗ്നൽ ലൈറ്റുകളുടെ പരിപാലനം പൊലീസ് വകുപ്പിന്റെ കീഴിലുള്ള റോഡ് സേഫ്ടി​ വിഭാഗത്തിനാണ്. കരാർ തുക നൽകാത്തതി​നാലാണ് സിഗ്നൽ ലൈറ്റുകൾ നന്നാക്കാൻ കെൽട്രോൺ വിമുഖത കാട്ടുന്നത്. ഏപ്രിൽ 13ന് പുലർച്ചെയുണ്ടായ അപകടത്തിൽ മൊബൈൽ പൈലിംഗ് ട്രക്കിന് അടിയിൽപ്പെട്ട് പത്രം ഏജന്റ് മരിക്കുകയും സമീപത്തുള്ള ഓട് മേഞ്ഞ ഇരുനില കെട്ടിടം ഭാഗികമായി തകരുകയും ചെയ്തിരുന്നു. തുടർന്നും അപകടങ്ങൾ പതിവായതോടെയാണ് നഗരസഭ മുൻകൈയെടുത്ത് തകരാർ പരിഹരിക്കാൻ തയ്യാറായത്.