ഇടുക്കി: യു.ഡി.എഫ് സ്ഥാനാർത്ഥി ഡീൻ കുര്യാക്കോസ് നാമനിർദേശ പത്രിക സമർപ്പിച്ചു. വരണാധികാരിയായ ജില്ലാ കളക്ടർ ഷീബ ജോർജ്ജ് മുമ്പാകെയാണ് പത്രിക സമർപ്പിച്ചത്. രാവിലെ ജന്മനാടായ പൈങ്ങോട്ടൂരിൽ വിവിധ ഇടങ്ങളിൽ ജനങ്ങളെ കണ്ട് അനുഗ്രഹം വാങ്ങിയ ശേഷമാണ് ഡീൻ ചെറുതോണിയിൽ എത്തിയത്. അവിടെ വ്യാപാര സ്ഥാപനങ്ങളിൽ എത്തി വോട്ട് തേടി. തൊഴിലാളികൾ, സ്ത്രീകൾ, കുട്ടികൾ എന്നിവർ ചേർന്ന് യു.ഡി.എഫ് സ്ഥാനാർത്ഥിയെ സ്വീകരിച്ചു. തുടർന്ന് ജില്ലാ കോൺഗ്രസ് കമ്മിറ്റി ഓഫിസിൽ എത്തി. പൊതു പര്യടനത്തിനുള്ള ഒരുക്കങ്ങൾ ചർച്ച ചെയ്തു. വെള്ളിയാഴ്ച ഇടുക്കി ബ്ലോക്ക് പരിധിയിൽ നിന്നാണ് പൊതുപര്യടനം ആരംഭിക്കുന്നത്. കൊലുമ്പൻ സമാധിയിൽ പുഷ്പാർച്ചന നടത്തിയ ശേഷമാണ്നാമനിർദ്ദേശ പത്രിക സമർപ്പിക്കുന്നതിന് കളക്ട്രേറ്റിൽ എത്തിയത്.

എ.കെ. മണിയുടെ നേതൃത്വത്തിൽ മൂന്നാറിലെ തോട്ടം തൊഴിലാളികൾ സമാഹരിച്ചു നൽകിയ തുകയാണ് ഡീൻ കുര്യാക്കോസ് തിരഞ്ഞെടുപ്പിൽ കെട്ടിവെച്ചത്. ഡി.സി.സി പ്രസിഡന്റ് സി.പി. മാത്യു, കെ.പി.സി.സി ജനറൽ സെക്രട്ടറി എസ്. അശോകൻ, യു.ഡി.എഫ് ജില്ലാ കൺവീനർ എം.ജെ. ജേക്കബ്, മുസ്ലിംലീഗ് സംസ്ഥാന സെക്രട്ടറി കെ.എം.എ. ഷുക്കൂർ, ഇ.എം. ആഗസ്തി, റോയി കെ. പൗലോസ്, ഇബ്രാഹിംക്കുട്ടി കല്ലാർ എന്നിവർ യു.ഡി.എഫ് സ്ഥാനാർത്ഥിയോടൊപ്പമുണ്ടായിരുന്നു.