ഇടുക്കി: യു.ഡി.എഫ് സ്ഥാനാർത്ഥി ഡീൻ കുര്യാക്കോസിന്റെ സ്ഥാനാർത്ഥി പര്യടനത്തിന് ദേവികുളം മണ്ഡലത്തിലെ വിവിധ പഞ്ചായത്തുകളിൽ തുടക്കമിട്ടു. ഇന്നലെ മാങ്കുളം, പള്ളിവാസൽ, ബൈസൺവാലി പഞ്ചായത്തുകളിൽ ഡീൻ പ്രചാരണത്തിന് എത്തി. രാവിലെ കുറത്തികുടിയിൽ നിന്നാണ് ഡീൻ പ്രചാരണം ആരംഭിച്ചത്. തുടർന്ന് ആനകുളം, ചിക്കണംകുടി, കുവൈറ്റ് സിറ്റി, മാങ്കുളം സെൻട്രൽ, കുരിശുപാറ, കല്ലാർ, കമ്പിലൈൻ, ആനവിരട്ടി, അമ്പഴച്ചാൽ എന്നിവിടങ്ങളിൽ യു.ഡി.എഫ് സ്ഥാനാർത്ഥി പ്രചാരണത്തിനെത്തി. രാവിലെ ആനക്കുളത്ത് യു.ഡി.എഫ് ജില്ലാ ചെയർമാൻ ജോയി വെട്ടിക്കുഴി പര്യടനം ഉദ്ഘാടനം ചെയ്തു.

കേരള കോൺഗ്രസ് നിയോജക മണ്ഡലം പ്രസിഡന്റ് സാജു ജോസ് അദ്ധ്യക്ഷത വഹിച്ചു. തോക്കുപാറ, 20 ഏക്കർ, പൊട്ടൻകാട്, ടീ കമ്പനി, ബൈസൻവാലി, അമ്പുകട, ചോക്രമുടി, സോസൈറ്റിമേട് എന്നിവിടങ്ങളിൽ ഉച്ചയ്ക്ക് ശേഷം യു.ഡി.എഫ് സ്ഥാനാർത്ഥി പര്യടനം നടത്തി. കോമാളിക്കൂടി, അമ്പലപ്പടി, 40 ഏക്കർ, കൊച്ചുപ്പ്, എല്ലക്കല്ല്, കുഞ്ചിതണ്ണി എന്നിവിടങ്ങളിൽ സ്വീകരണം ഏറ്റുവാങ്ങിയ പര്യടനം വൈകിട്ട് ആനച്ചാലിൽ സമാപിച്ചു. സമാപന സമ്മേളനം കോൺഗ്രസ് വക്താവ് രാജു പി. നായർ ഉദ്ഘാടനം ചെയ്തു. ഇന്ന് കോതമംഗലം നിയോജക മണ്ഡലത്തിലെ വിവിധ പഞ്ചായത്തുകളിൽ ഡീൻ പ്രചാരണം നടത്തും.