പീരുമേട്: ഇടുക്കി ലോക്‌സഭ മണ്ഡലം എൻ. ഡി.എ സ്ഥാനാർഥി അഡ്വ.സംഗീതാ വിശ്വനാഥന്റ പീരുമേട് മണ്ഡലത്തിലെ രണ്ടാം ദിവസത്തെ പര്യടനം കുട്ടിക്കാനത്ത് ബി.ജെ.പി ജില്ലാ സെക്രട്ടറി എ.വി. മുരളി ഉദ്ഘാടനം ചെയ്തു. പീരുമേട്ടിലെ വിവിധ മേഖലകളിൽ സ്വീകരണങ്ങൾ ഏറ്റുവാങ്ങിയ സ്ഥാനാർഥി തോട്ടം മേഖലയുടേത് ദുരിതജീവിതമാണെന്നും ഉടൻ പരിഹരിക്കപ്പെടണമെന്നും ആവശ്യപ്പെട്ടു. വാഗ്ദാനങ്ങൾ മാത്രമായിരുന്നു ഇരുമുന്നണികളും നാളിതുവരെ നൽകിയിരുന്നത്. അടച്ചുപൂട്ടപ്പെട്ട തോട്ടങ്ങൾ തുറക്കുന്നതിന് ഇടതു വലതു മുന്നണികൾ നാളിതുവരെ യാതൊരു ശ്രമവും നടത്തിയിട്ടില്ല. വാഗ്ദാനങ്ങളല്ല,പാലിക്കപ്പെടേണ്ട ഉറപ്പാണ് വേണ്ടത്. നിരവധി ഫാക്ടറികൾ പ്രവർത്തനരഹിതമായി കിടക്കുകയാണെന്നും തൊഴിലാളികളുടെ ജീവിതഉപാധികൾ ഇതോടെ ഇല്ലാതായെന്നും സംഗീത പറഞ്ഞു. ബി.ജെ.പി ജില്ലാ ഉപാദ്ധ്യക്ഷൻമാരായ കെ.കുമാർ,സി.സന്തോഷ് കുമാർ, പീരുമേട് മണ്ഡലം പ്രസിഡന്റ് അംബിയിൽ മുരുകൻ, മണ്ഡലം ജനറൽ സെക്രട്ടറിമാരായ അയ്യപ്പദാസ്, പ്രിയാ റജി, ബി.ഡി.ജെ.എസ് സംസ്ഥാന സമിതി അംഗം മനേഷ് കൊടിക്കയത്ത്, ജില്ലാ ജനറൽ സെക്രട്ടറി കെ.പി. ബിനീഷ് എന്നിവർ പങ്കെടുത്തു.