മുട്ടുകാട്: എൻ.ഡി.എ ഇടുക്കിയിൽ വിജയിച്ചാൽ ജനങ്ങളുടെ കാര്യങ്ങൾ നടത്തിത്തരുമെന്നും മറിച്ചാണെങ്കിൽ ഇനിയും ഇടുക്കിക്കാർ കാര്യംനടക്കാൻ നടന്നു മടുക്കുമെന്നും ബി.ഡി.ജെ.എസ് ജില്ലാ പ്രസിഡന്റ് പ്രതീഷ് പ്രഭ പറഞ്ഞു. ചിന്നക്കനാൽ പഞ്ചായത്തിലെ മുട്ടുകാടിൽ എൻ.ഡി.എ സ്ഥാനാർത്ഥി സംഗീത വിശ്വനാഥന്റെ പര്യടനം ഉദ്ഘാടനം ചെയ്യുകയായിരുന്നു അദ്ദേഹം. ജില്ലയിലെ ഭൂപ്രശനങ്ങൾ പരിഹരിക്കാൻ ഇരു മുന്നണികൾക്കും ഇതുവരെ സാധിച്ചിട്ടില്ല. കേന്ദ്രം വന നിയമം ഭേദഗതി ചെയ്തിട്ടും അത് പ്രയോജനപ്പെടുത്താനും രണ്ടു കൂട്ടരും ശ്രമിക്കുന്നില്ല. എൻ.ഡി.എ സ്ഥാനാർത്ഥി വിജയിച്ചാൽ കേന്ദ്ര നിയമം പ്രയോജനപ്പെടുത്തി ജില്ലയിലെ ഭൂപ്രശനങ്ങൾക്ക് ശാശ്വതമായ പരിഹാരം കാണുമെന്നും അദ്ദേഹം പറഞ്ഞു. ബി.ജെ.പി ദേവികുളം മണ്ഡലം പ്രസിഡന്റ് വി.ആർ. അളഗരാജ് അദ്ധ്യക്ഷത വഹിച്ച യോഗത്തിൽ ബി.ജെ.പി ജില്ലാ ജനറൽ സെക്രട്ടറി രതീഷ് വരകുമല,​ ജില്ലാ സെൽ കോഡിനേറ്റർ സോജൻ ജോസഫ്,​ മണ്ഡലം വൈസ് പ്രസിഡന്റ് പി.എ. ജോഷി, ബി.ഡി.ജെ.എസ് ജില്ലാ ജനറൽ സെക്രട്ടറി സന്തോഷ് തോപ്പിൽ,​ ബി.ഡി.ജെ.എസ് മണ്ഡലം പ്രസിഡന്റ് സുരേന്ദ്രൻ കൂട്ടക്കല്ലേൽ, സംസ്ഥാന എക്സിക്യൂട്ടീവ് അംഗം പാർത്ഥേശൻ ശശികുമാർ എന്നിവർ സംസാരിച്ചു.