രാജാക്കാട്: ടൗണിൽ എച്ച്.പി പമ്പിന് സമീപം നിയന്ത്രണം വിട്ട കാർ ഇടിച്ച് നിരവധി വാഹനങ്ങൾക്കും യാത്രക്കാർക്കും പരുക്ക്. വെള്ളത്തൂവൽ സ്വദേശിയായ കാർ ഡ്രൈവർ മദ്യപിച്ചതിന് ശേഷം വാടക വീട്ടിലേക്ക് പോകുന്ന വഴി കാറിന്റെ നിയന്ത്രണം തെറ്റുകയായിരുന്നു. ആദ്യം ഫെഡറൽ ബാങ്കിന് സമീപം റോഡിന്റെ വലതുവശത്ത് പാർക്കു ചെയ്തിരുന്ന ഏസ്റ്റാർ കാറിൽ ഇടിച്ച് ഇരു ഡോറുകൾക്കും കേടുപാടുകൾ സംഭവിച്ചു. തുടർന്ന് പമ്പിന് സമീപം വളവു തിരിഞ്ഞു വന്ന കാറിലും തുടർന്ന് ഓട്ടോറിക്ഷയിലും ഇടിച്ച ശേഷം അതുവഴി വന്ന ജീപ്പിലേക്ക് ഇടിച്ചു കയറി സമീപത്തുള്ള വീടിന്റെ കൽക്കെട്ടിൽ ഇടിച്ചാണ് നിന്നത്. ഇടിയിൽ എതിരെ വന്ന വാഗണർ കാറിന്റെ രണ്ടു വാതിലുകളും തകർന്നു. ജീപ്പിന്റെ ബംബർ തകർന്നു ഓയിൽ റോഡിലേക്ക് പൊട്ടിയൊഴുകി. ഓട്ടോറിക്ഷയുടെ മുൻഭാഗവും പിൻഭാഗവും തകർന്നു. പരിക്കേറ്റ ഓട്ടോ ഡ്രൈവർ വട്ടക്കണ്ണിപ്പാറ ഒറ്റപ്ലാക്കൽ ജിനു, യാത്രക്കാരനായ സൂരജ് എന്നിവർ രാജാക്കാട് സ്വകാര്യ ആശുപത്രിയിൽ ചികിത്സ തേടി. രാജാക്കാട് പൊലീസ് മേൽനടപടികൾ സ്വീകരിച്ചു.