കാസർകോട്: തൊഴിലാളികളെ മറന്ന കേന്ദ്ര-സംസ്ഥാന സർക്കാരുകൾക്കെതിരെ വിധിയെഴുതണമെന്ന് കോൺഗ്രസ് പ്രവർത്തക സമിതി അംഗം രമേശ് ചെന്നിത്തല. കാസർകോട് പാർലമെന്റ് മണ്ഡലം യു.ഡി.എഫ് സ്ഥാനാർത്ഥി രാജ്മോഹൻ ഉണ്ണിത്താന്റെ തിരഞ്ഞെടുപ്പ് പ്രചരണാർത്ഥം യു.ഡി.ടി.എഫ് ജില്ലാ കമ്മിറ്റി കാസർകോട് മുൻസിപ്പൽ കോൺഫറൻസ് ഹാളിൽ സംഘടിപ്പിച്ച തൊഴിലാളി സംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.

തൊഴിലാളികൾ കാലങ്ങളായി നേടിയെടുത്ത തൊഴിൽ സുരക്ഷിതത്വവും നിയമപരമായ അവകാശങ്ങളും അപ്പാടെ ഇല്ലാതാക്കി തൊഴിൽ നിയമങ്ങൾ കോർപ്പറേറ്റുകൾക്ക് അടിയറവെച്ച കേന്ദ്ര സർക്കാരിനും ക്ഷേമ പെൻഷൻ ഔദാര്യമാക്കി ക്ഷേമബോർഡുകളെ തകർത്ത സംസ്ഥാന സർക്കാരിനുമെതിരെ തൊഴിലാളികളും കുടുംബങ്ങളും ബാലറ്റിലൂടെ പ്രതികരിക്കണമെന്നും ചെന്നിത്തല പറഞ്ഞു.

എസ്.ടി.യു ദേശീയ വൈസ് പ്രസിഡന്റ് എ. അബ്ദുൽ റഹ്മാൻ അദ്ധ്യക്ഷത വഹിച്ചു. ഐ.എൻ.ടി.യു.സി ജില്ലാ പ്രസിഡന്റ് പി.ജി ദേവ് സ്വാഗതം പറഞ്ഞു. എസ്.ടി,യു സംസ്ഥാന പ്രസിഡന്റ് അഡ്വ. എം. റഹ്മത്തുള്ള മുഖ്യ പ്രഭാഷണം നടത്തി. മുസ്ലിം ലീഗ് സംസ്ഥാന ട്രഷറർ സി.ടി. അഹമ്മദലി, യു.ഡി.എഫ് ജില്ലാ ചെയർമാൻ കല്ലട്ര മാഹിൻ ഹാജി, ഡി.സി.സി. പ്രസിഡന്റ് പി.കെ. ഫൈസൽ, എൻ.എ. നെല്ലിക്കുന്ന് എം.എൽ.എ, കെ. നീലകണ്ഠൻ, അഡ്വ. എ. ഗോവിന്ദൻ നായർ, പി.എം. മുനീർ ഹാജി, കെ.പി. മുഹമ്മദ് അഷ്റഫ്, ഷറീഫ് കൊടവഞ്ചി, എ. അഹമ്മദ് ഹാജി, അഷ്റഫ് എടനീർ, മാഹിൻ കേളോട്ട്, കെ. ഖാലിദ തുടങ്ങിയവർ പ്രസംഗിച്ചു.