കോഴിക്കോട്: ലോക്‌സഭാ തിരഞ്ഞെടുപ്പിൽ നിരോധിത പ്ലാസ്റ്റിക് മാലിന്യങ്ങൾ പൂർണമായും ഒഴിവാക്കി പരിസ്ഥിതി സൗഹൃദ പ്രചരണങ്ങളും പ്രവർത്തനങ്ങളും നടത്തുന്നതിനോടനുബന്ധിച്ച് ഗ്രീൻ ഇലക്ഷൻ, ക്ലീൻ ഇലക്ഷൻ റീൽസ് മേക്കിംഗ് മത്സരം സംഘടിപ്പിക്കുന്നു. തിരഞ്ഞെടുപ്പുമായി ബന്ധപ്പെട്ട് ഹരിതചട്ട പാലനത്തെ ഉയർത്തിക്കാണിക്കുന്ന തരത്തിലുള്ള വീഡിയോകളാണ് തയ്യാറാക്കേണ്ടത്. ക്രിയാത്മകമായ മികച്ച വീഡിയോകൾക്ക് പ്രത്യേക സമ്മാനങ്ങൾ നൽകുകയും ജില്ലാ തലത്തിൽ വിവിധ സോഷ്യൽ മീഡിയ പ്ലാറ്റ്‌ഫോമുകളിൽ പ്രചരിപ്പിക്കുന്നതുമായിരിക്കും.

കേരളത്തിൽ മാത്രം 25000 ത്തിൽപ്പരം ബൂത്തുകളിലായി രണ്ടര കോടി ജനങ്ങളാണ് തിരഞ്ഞടുപ്പിന്റെ ഭാഗമാവുന്നത്. ഈ പ്രക്രിയയിൽ മാത്രം 5000 ടണ്ണിൽ കൂടുതൽ മാലിന്യങ്ങൾ സൃഷ്ടിക്കപ്പെടാൻ സാദ്ധ്യതയുണ്ട്. ഈ സാഹചര്യത്തിൽ പ്രകൃതിയെ സംരക്ഷിക്കേണ്ട ഉത്തരവാദിത്തം ബോദ്ധ്യപ്പെടുത്തുന്നതാവണം വീഡിയോ.

@ മാർഗനിർദ്ദേശങ്ങൾ:

സ്‌കൂൾ വിദ്യാർത്ഥികളും, കോളേജ് വിദ്യാർത്ഥികളുമാണ് മത്സരത്തിൽ പങ്കെടുക്കേണ്ടത്. രണ്ട് വിഭാഗങ്ങളിലും സമ്മാനങ്ങൾ ഉണ്ടായിരിക്കും, പരമാവധി രണ്ട് മിനിട്ട് ദൈർഘ്യമുള്ള വീഡിയോകളാണ് തയ്യാറാക്കേണ്ടത്, ഒറ്റയ്‌ക്കോ ഗ്രൂപ്പായോ വീഡിയോ ചെയ്യാം.ഹരിതചട്ട പാലനവുമായി ബന്ധപ്പെട്ട നൂതന ആശയങ്ങൾ, ബോധവത്ക്കരണ സന്ദേശങ്ങൾ തുടങ്ങി ക്രിയേറ്റീവായ വ്യത്യസ്ത ആശയങ്ങൾ ഉപയോഗിക്കാം. മികച്ച വീഡിയോ തിരഞ്ഞെടുക്കുന്നതിന്റെ പൂർണ ഉത്തരവാദിത്വം ജില്ലാ ശുചിത്വ മിഷനായിരിക്കും. വീഡിയോകൾ 9645397403 ടെലഗ്രാം നമ്പറിൽ ഏപ്രിൽ 18 നകം അയച്ചുനൽകണം. സംശയങ്ങൾക്ക് 9645397403.