2230 ബൂത്തുകളിൽ 4460 വോളന്റിയർമാർ

കോഴിക്കോട്: പോളിംഗ് ബൂത്തിൽ ഭിന്നശേഷിക്കാരും അവശരുമായ വോട്ടർമാരെ സഹായിക്കാൻ ഹയർ സെക്കൻഡറി നാഷണൽ സർവീസ് സ്കീം വോളന്റിയർമാർ. ജില്ലയിലെ 2230 പോളിംഗ് ബൂത്തുകളിൽ 4460 വോളന്റിയർമാരാണ് സഹായത്തിനെത്തുക.

ജില്ലയിലെ 153 എൻ .എസ് .എസ് യൂണിറ്റുകളിൽ നിന്ന് തെരഞ്ഞെടുക്കപ്പെട്ട വോളന്റിയർമാർക്ക് ജില്ല ഇലക്ഷൻ ട്രെയിനിംഗ് ടീം പരിശീലനം നൽകി. എ.ഡി.എം കെ .അജീഷ് ഉദ്ഘാടനം ചെയ്തു. തിരഞ്ഞെടുപ്പ് ദിവസം രാവിലെ മുതൽ വൈകീട്ട് വരെ നിയോഗിക്കപ്പെട്ട ബൂത്തുകളിൽ വോളന്റിയർമാരുണ്ടാകും. കഴിഞ്ഞ നിയമസഭ തിരഞ്ഞെടുപ്പിൽ എൻ .എസ് .എസ് വോളന്റിയർമാർ കാണിച്ച മികവാർന്ന പ്രവർത്തനമാണ് ഈ തിരഞ്ഞെടുപ്പിലും അവസരം നൽകാൻ കാരണം. ജില്ലാ സാമൂഹ്യനീതി വകുപ്പുമായി ചേർന്നാണ് പ്രവർത്തനം.

സി .ആർ .സി ഡയറക്ടർ ഡോ. റോഷൻ ബിജിലി മുഖ്യ പ്രഭാഷണം നടത്തി. അസി. നോഡൽ ഓഫീസർ (ട്രെയിനിംഗ് സെൽ) കെ .ഷെറീന, ട്രെയിനിംഗ് കോ ഓർഡിനേറ്റർ പി.കെ .മുരളീധരൻ, മാസ്റ്റർ ട്രെയിനർ എം ബൈജു എന്നിവർ ക്ലാസെടുത്തു.