പാലാ: ഇടനാട് കൈരളി ശ്ലോകരംഗത്തിന്റെ 35ാം വാർഷികാഘോഷവും കെ.എൻ.വിശ്വനാഥൻ നായർ അനുസ്മരണവും ''ശ്ലോകോത്സവം 2024'' എന്ന പേരിൽ മെയ് 1ന് ആഘോഷിക്കുമെന്ന് ശ്ലോകരംഗം പ്രസിഡന്റ് കെ.എൻ.ജയചന്ദ്രൻ അറിയിച്ചു.

വലവൂർ ബാങ്ക് കൺവെൻഷൻ സെന്ററിൽ 1ന് രാവിലെ 8ന് ആചാര്യസ്മൃതി. തുടർന്ന് നടക്കുന്ന മത്സരങ്ങളുടെ ഉദ്ഘാടനം കരൂർ പഞ്ചായത്ത് പ്രസിഡന്റ് അനസ്യ രാമൻ നിർവഹിക്കും. 8.30ന് പ്രൊഫ. എൻ.ഡി. കൃഷ്ണനുണ്ണി സ്മാരക സംസ്‌കൃത അക്ഷരശ്ലോകം നടക്കും. 9.15 മുതൽ അക്ഷരശ്ലോക മത്സരവും 11 മുതൽ കാവ്യകേളി മത്സരവും . 12 ന് 35ാമത് ബാച്ചിന്റെ അരങ്ങേറ്റം.

3ന് ചേരുന്ന വാർഷിക സമ്മേളനം ഗുരുവായൂർ ദേവസ്വം ചെയർമാൻ ഡോ.വി.കെ.വിജയൻ ഉദ്ഘാടനം ചെയ്യും. ആലങ്ങോട് ലീലാകൃഷ്ണൻ മുഖ്യപ്രഭാഷണം നടത്തും. കെ.എൻ.വിശ്വനാഥൻ നായരുടെ കൈയ്യെഴുത്ത് രേഖയുടെ പ്രകാശനം ശ്രീകുമാർ മുഖത്തല നിർവഹിക്കും. വിവിധ പ്രതിഭകൾക്കുള്ള അനുമോദനവും സമ്മാനദാനവും ഗുരുവായൂർ ദേവസ്വം ബോർഡ് മെമ്പർ മനോജ് ബി.നായർ നിർവഹിക്കും. അഡ്വ.സോമശേഖരൻ നായർ, ഡോ.ആര്യാംബിക തുടങ്ങിയവർ പ്രസംഗിക്കും. കെ.എൻ.ജയചന്ദ്രൻ അദ്ധ്യക്ഷത വഹിക്കും. വിവിധ പുരസ്‌കാരങ്ങൾ നേടിയ ശ്രീകാന്ത് താമരശ്ശേരി, ഹരിശങ്കർ എസ്. വിശ്വനാഥ് എന്നിവരെ അനമോദിക്കും. വി. രാമചന്ദ്രൻ മാസ്റ്ററെ പൊന്നാട അണിയിച്ചാദരിക്കും. കെ.വേലപ്പൻപിള്ള, രവി പുലിയന്നൂർ, ബാലു എസ്. നായർ, ഡോ. ജയലക്ഷ്മി.ആർ തുടങ്ങിയവർ ആശംസകൾ നേരും. വൈകിട്ട് 5.30 മുതൽ കാവ്യസന്ധ്യ, 7.30ന് അക്ഷരശ്ലോകസദസ്.