മുണ്ടക്കയം ഈസ്റ്റ് : വോട്ട് ചെയ്യാൻ പോളിംഗ് ബൂത്തിൽ വീൽചെയറോ അനുബന്ധ സൗകര്യങ്ങളോ ഒരുക്കിയില്ല ഭിന്നശേഷിക്കാരനായ സർക്കാർ ഉദ്യോഗസ്ഥൻ വോട്ട് ചെയ്യാതെ മടങ്ങി. ഇടുക്കി ലോക്‌സഭ മണ്ഡലത്തിൽ പെരുവന്താനം പഞ്ചായത്തിൽ പതിനാലാം വാർഡിൽ ബൂത്ത് നമ്പർ 122 ലാണ് ഭിന്നശേഷിക്കാരൻ വോട്ട് ചെയ്യാൻ സൗകര്യം ഇല്ലാത്തതിനെ തുടർന്ന് മടങ്ങേണ്ടിവന്നത്. പെരുവന്താനം കൊടികുത്തിയിൽ മുടത്തിപ്ലാക്കൽ വിട്ടിൽ ബിനു എം.കോശിയാണ് വോട്ട് ചെയ്യാതെ മടങ്ങിയത്. കുടുംബസമേതം വോട്ട് ചെയ്യാൻ ഭിന്നശേഷിക്കാർക്ക് സൗകര്യമൊരുക്കിയ കാറിൽ സ്വന്തമായി ഡ്രൈവ് ചെയ്താണ് മുണ്ടക്കയം ഈസ്റ്റ് ഡി പോൾ സ്‌കൂളിൽ ഒരുക്കിയ 122ാം ബൂത്തിൽ എത്തിത്. കാറിൽ നിന്നും പോളിംഗ് ബൂത്തിലേയ്ക്ക് വരെ പോകാൻ വിൽ ചെയർ ആവശ്യപ്പെട്ടു. എന്നാൽ വീൽചെയറോ മറ്റ് സൗകര്യങ്ങളോ ഒരുക്കാത്തതിനെത്തുടർന്ന് ബിനു വോട്ട് ചെയ്യാതെ വീട്ടലേക്ക് തന്നെ മടങ്ങുകയായിരുന്നു. ഭിന്നശേഷിക്ക് മതിയായ സൗകര്യം പോളിംഗ് സ്റ്റേഷനിൽ ഒരുക്കിയെന്ന ഇലക്ഷൻ കമ്മീഷന്റെ പ്രഖ്യാപനം നടപ്പായില്ല.