അബുദാബി: മീന്‍ പിടിക്കാന്‍ അറിയുന്ന ആളാണോ നിങ്ങള്‍? വെറും മീന്‍പിടുത്തമല്ല, കടലില്‍ പോയി നല്ല ഒന്നാന്തരം നെയ്മീന്‍ പിടിക്കാന്‍ അറിയാമോ എന്നാണ് ചോദ്യം. അങ്ങനെയാണെങ്കില്‍ നിങ്ങള്‍ക്ക് 45 ലക്ഷം ഇന്ത്യന്‍ രൂപ സമ്മാനമായി കിട്ടാനുള്ള വകുപ്പുണ്ട്.
അബുദാബിയില്‍ കടലില്‍ പോയി നല്ല നെയ്മീന്‍ പിടിച്ചുകൊണ്ടുവരാന്‍ കഴിയുന്നവര്‍ക്ക് രണ്ട് ലക്ഷം ദിര്‍ഹം (45 ലക്ഷം ഇന്ത്യന്‍ രൂപ ) സമ്മാനം നേടാന്‍ അവസരം. അബുദാബി ഗ്രാന്‍ഡ് കിങ്ഫിഷ് ചാമ്പ്യന്‍ഷിപ്പാണ് മീന്‍പിടിത്തം ഹരമാക്കിയവര്‍ക്കായി ഇത്തരമൊരു മത്സരം സംഘടിപ്പിക്കുന്നത്.
ഏപ്രില്‍ 19 മുതല്‍ 21 വരെ നടക്കുന്ന മത്സരത്തില്‍ പിടിക്കുന്ന മത്സ്യത്തിന്റെ ഭാരം കണക്കാക്കിയാണ് ജേതാക്കളെ തീരുമാനിക്കുന്നത്.
രണ്ട് ലക്ഷം ദിര്‍ഹം സമ്മാനം നല്‍കുമ്പോള്‍ 60ാം സ്ഥാനക്കാര്‍ക്ക് വരെ ക്യാഷ് അവാര്‍ഡ് നല്‍കുമെന്നാണ് സംഘാടകര്‍ അറിയിക്കുന്നത്. മൊത്തം 10 ലക്ഷം ദിര്‍ഹമാണ് സമ്മാനത്തുക. താല്‍പര്യമുള്ളവര്‍ക്ക് അബുദാബി സ്പോര്‍ട്സ് കൗണ്‍സില്‍ വെബ്സൈറ്റില്‍ (adsc.ae) ഏപ്രില്‍ 15 വരെ പേര് രജിസ്റ്റര്‍ ചെയ്യാന്‍ അവസരമുണ്ട്. 200 ദിര്‍ഹം രജിസ്ട്രേഷന്‍ ഫീസ് ഈടാക്കും.
ഏപ്രില്‍ 16ന് രാവിലെ ഏഴിന് അബുദാബി കരാമയിലെ മുഹമ്മദ് ഖലാഫ് മജ്ലിസില്‍ മത്സരനിയമങ്ങളെ കുറിച്ച് വിശദീകരിക്കും. 16-18 വരെ ബോട്ടിനുള്ള സ്ഥലം അനുവദിക്കും. 19 ന് അബുദാബി മറൈന്‍ സ്പോര്‍ട്സ് ക്ലബിന് സമീപത്തെ ബീച്ചില്‍ ബോട്ടുകള്‍ സംഗമിക്കും. ഇന്നര്‍ സ്റ്റിക്കറുകള്‍ പതിക്കും.
രാവിലെ 11 ന് മഞ്ഞക്കൊടി ഉയര്‍ത്തുന്നതോടെ ഒരുക്കങ്ങള്‍ തുടങ്ങും. പച്ചക്കൊടി ഉയര്‍ത്തുന്നതോടെ മൂന്ന് ദിവസം നീളുന്ന മീന്‍പിടിത്ത മത്സരം ആരംഭിക്കും.