1960കളിലാണ് പ്രപഞ്ചത്തിന്റെ അടിസ്ഥാന ഘടകങ്ങളിലെ പിണ്ഡത്തിന്റെ കാരണംതേടി ഹിഗ്സ് അടക്കമുള്ള ശാസ്ത്രജ്ഞർ അന്വേഷണം ആരംഭിച്ചത്. 1964ൽ അതിന്റെ ഉത്തരമായി ഹിഗ്സ് ബോസോൺ കണത്തിന്റെ ആശയം അദ്ദേഹം അവതരിപ്പിച്ചു.

വർഷങ്ങൾക്കിപ്പുറം 2013ൽ , ഹിഗ്സ് ബോസോൺ കണങ്ങൾ പ്രപഞ്ചത്തെ ബന്ധിപ്പിക്കാൻ സഹായിക്കുന്നത് എങ്ങനെയെന്ന പഠനത്തിന് ഭൗതിക ശാസ്ത്ര നോബൽ അദ്ദേഹത്തെ തേടിയെത്തി.

2012ൽ സ്വിറ്റ്സർലൻഡിലെ യൂറോപ്യൻ ഓർഗനൈസേഷൻ ഫോർ ന്യൂക്ലിയർ റിസേർച്ചിലെ ഭീമൻ ഹാഡ്രൺ കൊളൈഡറിലൂടെ ഗവേഷകർ ഹിഗ്സ് അവതരിപ്പിച്ച അടിസ്ഥാന കണത്തിന്റെ അസ്ഥിത്വം തിരിച്ചറിയുകയും ഹിഗ്സ് ബോസോൺ എന്ന് പേര് നൽകുകയും ചെയ്തതോടെയാണ് നോബൽ തേടിയെത്തിയത്.

ബെൽജിയൻ ഗവേഷകനായ ഫ്രാൻസിസ് എൻഗ്ലെർട്ടും അദ്ദേഹത്തോടൊപ്പം നോബൽ പങ്കിട്ടു. ഹിഗ്സ് ബോസോൺ ' ദൈവ കണം' എന്ന അപരനാമത്തിലാണ് ശാസ്ത്രലോകത്ത് അറിയപ്പെടുന്നത്.

ക്വാണ്ടം മെക്കാനിക്സിൽ അതുല്യ സംഭാവനകൾ നൽകിയ ഇന്ത്യൻ ശാസ്ത്രജ്ഞൻ സത്യേന്ദ്ര നാഥ് ബോസിന്റെ ' ബോസോൺ' കണികാ സിദ്ധാന്തത്തിൽ നിന്നാണ് ഹിഗ്സ് ബോസോൺ കണത്തിന്റെ ആശയങ്ങളിലേക്ക് പീറ്റർ ഹിഗ്സ് അടക്കമുള്ള ഗവേഷകരെ നയിച്ചത്. അതിനാലാണ് കണത്തിന്റെ പേരിൽ ഹിഗ്സിനൊപ്പം ബോസിനും ശാസ്ത്രലോകം ആദരമർപ്പിച്ചത്.