കോഴിക്കോട്: വെള്ളയിൽ ഗാന്ധി റോഡിലെ കാർ വർക്ക്ഷോപ്പിൽ തീപിടിത്തം. ജനവാസ മേഖലയാണിത്. രാവിലെ പത്തരയോടെയാണ് സംഭവം. സമീപത്തെ തെങ്ങിനും തീപിടിച്ചു. ഇത് തൊട്ടടുത്ത മരങ്ങളിലേക്കും വീടുകളിലേക്കുമൊക്കെ പടരാൻ സാദ്ധ്യതയുണ്ടെന്ന ആശങ്കയിലാണ് നാട്ടുകാർ.
തീപിടിത്തമുണ്ടായി അരമണിക്കൂറിന് ശേഷമാണ് ഫയർ ഫോഴ്സ് ഉദ്യോഗസ്ഥർ സ്ഥലത്തെത്തിയതെന്ന് നാട്ടുകാർ പറഞ്ഞു. വർക്ക്‌‌ഷോപ്പിലെ ജീവനക്കാർ സുരക്ഷിതരാണെന്നാണ് വിവരം. ഞായറാഴ്‌ചയായതിനാൽ വളരെ കുറച്ച് ജീവനക്കാർ മാത്രമേ ഉണ്ടായിരുന്നുള്ളൂ. നിരവധി വാഹനങ്ങളും വർക്ക്ഷോപ്പിൽ നിർത്തിയിട്ടിരുന്നു.
കൂടുതൽ ഫയർ ഫോഴ്സ് യൂണിറ്റുകൾ സ്ഥലത്തെത്തിയിട്ടുണ്ട്. വർക്ക്‌ഷോപ്പിന്റെ പെയിന്റിംഗ് യൂണിറ്റിലാണ് ആദ്യം തീപിടിച്ചത്. ഉടൻ തന്നെ നാട്ടുകാർ സ്ഥലത്തെത്തുകയും തീയണക്കാൻ ശ്രമിക്കുകയും ചെയ്‌തു.
കയർഫെഡിന്റെയും കേരള സോപ്പിന്റെയും കമ്പനികൾ പ്രവർത്തിക്കുന്നതിന് തൊട്ടടുത്താണ് തീപിടിത്തമുണ്ടായത്. ഇവിടെയൊക്കെ നിരവധി പേർ ജോലി ചെയ്യുന്നുണ്ട്. തീ ഇങ്ങോട്ടേക്ക് പടർന്നാൽ ആളപായവും വലിയ നാശനഷ്ടങ്ങളുമൊക്കെ ഉണ്ടാകാൻ സാദ്ധ്യതയുണ്ടായിരുന്നതായി നാട്ടുകാർ പറയുന്നു. തീപിടിത്തത്തിന്റെ കാരണം വ്യക്തമല്ല. തീ നിയന്ത്രണ വിധേയമാക്കിയതായി റിപ്പോർട്ടുകളുണ്ട്.