കോഴിക്കോട് : കാണാതായ പത്താം ക്ലാസ് വിദ്യാർത്ഥിനിയെയും യുവാവിനെയും തൂങ്ങിമരിച്ച നിലയിൽ കണ്ടെത്തി. താമരശേരി വൊക്കേഷണൽ ഹയർ സെക്കൻഡറി സ്കൂൾ വിദ്യാ‌ർത്ഥിനി ദേവനന്ദയെയും എകരൂൽ സ്വദേശി വിഷ്ണുവിനെയുമാണ് മരിച്ച നിലയിൽ കണ്ടെത്തിയത്. കട്ടിപ്പാറ കരിഞ്ചോല പെരിങ്ങോട് ബിജുവിന്റെ മകളാണ് ദേവനന്ദ. കഴിഞ്ഞ വെള്ളിയാഴ്ച പുലർച്ചെ മുതലാണ് പെൺകുട്ടിയെയും യുവാവിനെയും കാണാതായത്. പെൺകുട്ടിയെ കാണാനില്ലെന്ന് പരാതി നൽകിയിട്ടും അന്വേഷണം നടത്തുന്നില്ലെന്ന് കഴിഞ്ഞ ദിവസം പിതാവ് ആരോപിച്ചിരുന്നു.

ബാലുശേരി കണ്ണാടിപ്പൊയിൽ കാപ്പിക്കുന്നിലെ ആൾത്താമസമില്ലാത്ത വീട്ടിലാണ് ഇവരെ തൂങ്ങിമരിച്ച നിലയിൽ കണ്ടെത്തിയത്. മൃതദേഹത്തിന് ദിവസങ്ങളുടെ പഴക്കമുണ്ടെന്നാണ് നിഗമനം. ദുർഗന്ധം വമിച്ചതോടെ നാട്ടുകാർ നടത്തിയ പരിശോധനയിലാണ് വൈകിട്ടോടെ ഇവരുടെ മൃതദേഹം കണ്ടെത്തിയത്.