തിരുവനന്തപുരം: തിരുവനന്തപുരം അന്താരാഷ്ട്ര വിമാനത്താവളം വഴി കടത്താൻ ശ്രമിച്ച ഒരു കോടിയോളം രൂപ വിലവരുന്ന സ്വർണം കസ്റ്റംസ് പിടികൂടി. അടിവസ്ത്രത്തിൽ ഒളിപ്പിച്ച നിലയിലാണ് സ്വർണം കണ്ടെത്തിയത്. സ്വർണം കടത്താൻ ശ്രമിച്ച തിരുവനന്തപുരം സ്വദേശിയെ കസ്റ്റംസ് പിടികൂടി. രഹസ്യ വിവരത്തിന്റെ അടിസ്ഥാനത്തിൽ എയർ കസ്റ്റംസാണ് സ്വർണം പിടികൂടിയത്.

ഇന്ന് വൈകീട്ട് തമിഴ്നാട്ടിലെ തിരുച്ചിറപ്പള്ളി വിമാനത്താവളത്തിലും വൻ സ്വർണവേട്ട നടന്നിരുന്നു. 70 ലക്ഷം രൂപയുടെ സ്വർണമാണ് പിടികൂടിയത്. വിമാനത്താവളത്തിലെ എയർ ഇന്റലിജൻസ് യൂണിറ്റ് പ്രതിയെ പിടികൂടുകയായിരുന്നു. ദുബായിൽ നിന്നും എത്തിയ യാത്രക്കാരനിൽ നിന്നും 977 ഗ്രാം സ്വർണം പിടികൂടുകയായിരുന്നു. മലദ്വാരത്തിൽ ഒളിപ്പിച്ച് കടത്തുന്നതിനിടെയാണ് സ്വർണം പിടികൂടിയത്. പേസ്റ്റ് രൂപത്തിലാക്കി മൂന്ന് പായ്ക്കറ്റുകളിലാണ് സ്വർണം കടത്താൻ ശ്രമിച്ചത്. സംഭവത്തിൽ കൂടുതൽ അന്വേഷണം നടന്നുവരികയാണെന്ന് അധികൃതർ അറിയിച്ചിട്ടുണ്ട്.