ശരീര ശുചിത്വത്തിന് വലിയ പ്രാധാന്യം നല്‍കുന്നവരാണ് നമ്മള്‍ മലയാളികള്‍. വ്യക്തിശുചിത്വത്തില്‍ വലിയ പങ്കാണ് കുളിക്കുന്നതിനുള്ളത്. മഴക്കാലത്ത് പോലും നമ്മള്‍ മലയാളികള്‍ രണ്ട് നേരം കുളിക്കുന്നവരാണ്. കുളിയെ സംബന്ധിച്ച് വളരെയധികം വിശ്വാസങ്ങളും അന്ധവിശ്വാസങ്ങളും നമുക്കിടയില്‍ നിലനില്‍ക്കുന്നുണ്ട്. വ്യക്തിശുചിത്വത്തില്‍ പുരഷന്‍മാരേക്കാള്‍ പ്രാധാന്യം നല്‍കുന്നവരാണ് സ്ത്രീകള്‍. അതുകൊണ്ട് തന്നെ കുളിയുമായി ബന്ധപ്പെട്ട നിരവധി വിശ്വാസങ്ങളാണ് സ്ത്രീകള്‍ക്കിടയില്‍ നിലനില്‍ക്കുന്നത്.
സൂര്യോദയത്തിന് മുമ്പ് കുളിക്കുന്നത് സ്ത്രീക്ക് ഐശ്വര്യമാണെന്ന് പറയാറുണ്ട്. അത്തരത്തില്‍ കുളിക്കുന്ന സ്ത്രീകള്‍ ശ്രീദേവിയാകുന്നുവെന്നാണ് പറയപ്പെടുന്നതും. വീട്ടിലെ ലക്ഷ്മിയാണ് സ്തീയെന്ന സങ്കല്‍പ്പവും നമുക്കിടയിലുണ്ട്. കുളിക്കുമ്പോഴും കുളി കഴിഞ്ഞും ചില കാര്യങ്ങള്‍ ശ്രദ്ധിക്കുന്നത് വളരെയധികം ഗുണകരമാണെന്ന് പറയപ്പെടുന്നു. വിവിധ സമയങ്ങളില്‍ കുളിക്കാറുണ്ടെങ്കിലും പ്രധാനമായും നാല് സമയങ്ങളാണ് ഉള്ളതെന്നാണ് വിശ്വാസം.
അതിലൊന്നാണ് പുലര്‍ച്ചെ നാല് മണിക്കോ അഞ്ച് മണിക്കോ എഴുന്നേറ്റ ശേഷമുള്ള കുളി. ഇതിന് മുനിസ്‌നാനം എന്നാണ് പറയപ്പെടുന്നത്. അഞ്ച് മണ്ക്കും ആറ് മണിക്കും ഇടയിലുള്ള കുളിക്ക് ദേവസ്‌നാനം എന്നാണ് വിശേഷണം. ഇത് സ്ഥിരമായി ചെയ്യുന്നവര്‍ക്ക് സന്തോഷകരമായ ജീവിതവും ഒപ്പം കുടുംബത്തിനും നല്ലതാണെന്ന് പറയപ്പെടുന്നു. രാവിലെ ആറ് മണിക്കും എട്ട് മണിക്കും ഇടയിലുള്ള കുളിക്ക് മനുഷ്യസ്‌നാനം എന്നാണ് പറയുന്നത്.
മനുഷ്യസ്‌നാനം പതിവായി ചെയ്യുന്നവരുടെ കുടുംബത്തില്‍ സമാധാനവും സന്തോഷവും ഒപ്പം തന്നെ ഭാഗ്യവും കൈവരുമെന്നാണ് പറയപ്പെടുന്നത്. എന്നാല്‍ രാവിലെ എട്ട് മണിക്ക് ശേഷമുള്ള കുളിക്ക് രാക്ഷസക്കുളിയെന്നാണ് പറയുന്നത്. ഇത് ഒരു തരത്തിലും നല്ലതല്ലെന്നും വിശേഷിപ്പിക്കപ്പെടുന്നു. കുളി കഴിഞ്ഞ് വന്നാല്‍ ഉടനെ തന്നെ അടുക്കളയില്‍ കയറി എന്തെങ്കിലും ഒരു ഭക്ഷണമോ പാനീയമോ ഉപയോഗിക്കണമെന്നാണ് പറയപ്പെടുന്നത്. കുളിക്ക് ശേഷം അടുക്കളയില്‍ കയറുന്നതിന് മുമ്പ് ജപിക്കുന്നത് നല്ലതാണെന്നും പറയപ്പെടുന്നു.
അതുപോലെ തന്നെ കുളി കഴിഞ്ഞ് വന്നാല്‍ സ്ത്രീകള്‍ ഒരിക്കലും ചെയ്യാന്‍ പാടില്ലാത്ത ചില കാര്യങ്ങളുമുണ്ട്. കുളി കഴിഞ്ഞാലുടന്‍ നിങ്ങളുടെ മുടിയോ നഖമോ വെട്ടാന്‍ പാടില്ലെന്നാണ് പറയപ്പെടുന്നത്. ഇത് നിങ്ങള്‍ക്കും കുടുംബത്തിനും ദോഷം വരുത്താനിടയുണ്ട്. അതുപോലെ തന്നെ കുളിമുറിയില്‍ മുഷിഞ്ഞ വസ്ത്രങ്ങള്‍ കൂട്ടിയിടുന്ന പ്രവണതയും നല്ലതല്ലെന്ന് പറയപ്പെടാറുണ്ട്. മുഷിഞ്ഞ വസ്ത്രങ്ങള്‍ കൂട്ടിയിടുന്നത് നെഗറ്റീവ് എനര്‍ജിയുണ്ടാക്കുമെന്നാണ് പറയപ്പെടുന്നത്.