അഹമ്മദാബാദ്: ട്വന്റി 20 ലോകകപ്പിലേക്കുള്ള ഇന്ത്യൻ ടീമിനെ പ്രഖ്യാപിച്ചു. ഐപിഎല്ലിൽ മികച്ച പ്രകടനം കാഴ്ചവച്ച മലയാളി താരം സഞ്ജു സാംസൺ ടീമിൽ ഇടം നേടി. രണ്ടാം വിക്കറ്റ് കീപ്പറായാണ് സഞ്ജുവിനെ ഉൾപ്പെടുത്തിയിരിക്കുന്നത്. രോഹിത് ശർമ്മ നയിക്കുന്ന ടീമിൽ വൈസ് ക്യാപ്റ്റൻ ഹാർദിക് പാണ്ഡ്യയാണ്. യുസ്വേന്ദ്ര ചഹലിനും ടീമിൽ ഇടം നേടി. ഐപിഎല്ലിലെ മോശം പ്രകടനം കെഎൽ രാഹുലിന് തിരിച്ചടിയായി. രാഹുലിനെ ടീമിൽ ഉൾപ്പെടുത്തിയിട്ടില്ല.

വെസ്റ്റ് ഇൻഡീസും യുഎസ്എയും ആതിഥേയത്വം വഹിക്കുന്ന 2024 ഐസിസി ട്വന്റി 20 ലോകകപ്പിനുള്ള ഇന്ത്യയുടെ 15 അംഗ ടീമിനെ സീനിയർ സെലക്ഷൻ കമ്മിറ്റി ചൊവ്വാഴ്ചയാണ് തിരഞ്ഞെടുത്തത്. 2024 ജൂൺ 5 ന് ന്യൂയോർക്കിലെ നാസൗ കൗണ്ടി ഇന്റർനാഷണൽ ക്രിക്കറ്റ് സ്റ്റേഡിയത്തിൽ അയർലൻഡിനെതിരെ ഇന്ത്യ ആദ്യ മത്സരത്തിനിറങ്ങും. 2024 ജൂൺ 09 ന് പാകിസ്ഥാനെതിരെ ഇന്ത്യ അതേ വേദിയിൽ ഇറങ്ങും. ജൂൺ 12നും 15നും യഥാക്രമം യുഎസ്എയുമായും കാനഡയുമായും ഇന്ത്യ കളിക്കും.

ടീം: രോഹിത് ശർമ (ക്യാപ്റ്റൻ), ഹാർദിക് പാണ്ഡ്യ (വൈസ് ക്യാപ്റ്റൻ), യശസ്വി ജയ്സ്വാൾ, വിരാട് കൊഹ്ലി, സൂര്യകുമാർ യാദവ്, ഋഷഭ് പന്ത് (വി.കീ), സഞ്ജു സാംസൺ (വി.കീ), ശിവം ദുബെ, രവീന്ദ്ര ജഡേജ, അക്സർ പട്ടേൽ, കുൽദീപ് യാദവ്, യുസ്‌വേന്ദ്ര ചാഹൽ , അർഷ്ദീപ് സിംഗ്, ജസ്പ്രീത് ബുംറ, മുഹമ്മദ്. സിറാജ്.

റിസർവ് ടീം: ശുഭ്മാൻ ഗിൽ, റിങ്കു സിംഗ്, ഖലീൽ അഹമ്മദ്, അവേഷ് ഖാൻ