മല്ലപ്പള്ളി : എഴുമറ്റൂർ ഗവ.ഹയർസെക്കൻഡറി സ്കൂളിന്റെ പ്രവേശന കവാടത്തിന്റെ പുനർനിർമ്മാണത്തിനായി ഇറക്കിയ കരിങ്കല്ലുകൾ കാൽനടക്കാർക്കും, വാഹന യാത്രികർക്കും ബുദ്ധിമുട്ടാകുന്നു. 2023-2024 ൽ ജില്ലാ പഞ്ചായത്ത് പദ്ധതിയിൽ 10,0000രൂപ തുക അനുവദിച്ചാണ് പ്രവേശന കവാടത്തിനോട് ചേർന്നുള്ള ചുറ്റുമതിൽ നിർമ്മാണം 2023 ആഗസ്റ്റ് മാസത്തെ ആദ്യ ആഴ്ചയിൽ ആരംഭിച്ചത്. എന്നാൽ തിരുവിതാംകൂർ ക്ഷേത്ര പരിധിയിൽ ഉൾപ്പെടുന്ന കണ്ണശ തേവർ ക്ഷേത്രത്തിന്റെ ആൽത്തറയോട് ചേരുന്ന സ്കൂൾ പരിസരം ഒഴികെയുള്ള ഭാഗത്ത് നവീകരണം പൂർത്തിയാക്കിയെങ്കിലും ബാക്കി വരുന്ന മൂന്ന് മീറ്റർ ദൂരപരിധിയിൽ തർക്കം നിലനിൽക്കുന്നനാൽ പദ്ധതി തടസപ്പെട്ടു. ഇതുമൂലം നിർമ്മാണത്തിനായി ഇറക്കിയ കരിങ്കല്ലുകൾ റോഡിന്റെ വശത്ത് ഉപേക്ഷിക്കപ്പെട്ട നിലയിലാണ്. ഇരു ദിശകളിൽ നിന്ന് വാഹനം എത്തിയാൽ ഇവിടെ യാത്രാ ദുരിതത്തിന് ഇടയാക്കും. പദ്ധതി അടിയന്തരമായി പൂർത്തിയാക്കുകയോ നിർമ്മാണത്തിനായി ഇറക്കിയ കരിങ്കല്ലുകൾ സ്കൂൾ കോമ്പൗണ്ടിലേക്ക് നീക്കം ചെയ്യുകയോ ചെയ്യണമെന്നാണ് യാത്രക്കാരുടെയും പ്രദേശവാസികളുടെയും ആവശ്യം.