കോടുകുളഞ്ഞി (ചെങ്ങന്നൂർ): പുതു തലമുറയ്ക്ക് ഗുരു - ശിഷ്യ ബന്ധത്തിന്റെ മഹത്വമറിയിച്ച് നാല് പതിറ്റാണ്ടുകൾക്ക് ശേഷം ഗുരുവിനെ തേടി ശിഷ്യഗണങ്ങളെത്തി.തലവടി കുന്തിരിക്കൽ സി.എം.എസ് ഹൈസ്കൂളിലെ ആദ്യ ബാച്ചിലെ വിദ്യാർത്ഥികളാണ് തങ്ങളുടെ അദ്ധ്യാപകനെ തേടിയെത്തിയത്. ഹൈസ്ക്കൂളിന്റെ പൂർവിദ്യാർത്ഥി മെഗാ സംഗമം മേയ് 19ന് നടക്കുകയാണ്.ഇതോടനുബന്ധിച്ച് സംഘടിപ്പിക്കുന്ന ഗുരു വന്ദനം ചടങ്ങിലേക്ക് ക്ഷണിക്കാനാണ് പൂർവ വിദ്യാർത്ഥി സംഘടനാ ഭാരവാഹികളായ ബെറ്റി ജോസഫ്,സജി ഏബ്രഹാം, ഡോ.ജോൺസൺ വി.ഇടിക്കുള,ജിബി ഈപ്പൻ എന്നിവർ കോടുകുളഞ്ഞി കുറ്റിയ്ക്കൽ റെജി കുരുവിളയുടെ ഭവനത്തിലെത്തിയത്.1986ൽ ഇവർ സ്കൂൾ പഠനം പൂർത്തിയാക്കി. നാല്പത് വർഷങ്ങൾക്ക് ശേഷം ആദ്യമായിട്ടാണ് വീണ്ടും ഗുരുവിനെ കാണുന്നത്. 30മിനിറ്റോളം പഴയകാല ഓർമ്മകൾ പങ്കുവച്ചു. ശിഷ്യഗണങ്ങളെ അനുഗ്രഹിച്ചാണ് ഗുരു യാത്രയാക്കിയത്. എടത്വപഞ്ചായത്ത് അംഗം കൂടിയായ ബെറ്റി ജോസഫ് ഗുരുവിനെആദരിച്ചു. ഫോർമർ സ്റ്റുഡന്റ്സ് അസോസിയേഷന്‍ പ്രസിഡന്റ് റവ.മാത്യൂ ജിലോ നൈനാന്റെ അദ്ധ്യക്ഷതയിൽ ചേർന്ന യോഗത്തിലാണ് പൂർവ അദ്ധ്യാപകരെ ക്ഷണിച്ച് ഗുരു വന്ദനം നടത്തുവാൻ തീരുമാനിച്ചത്.