പത്തനംതിട്ട: മണ്ഡലത്തിലെ വോട്ടിംഗ് യന്ത്രങ്ങളും വി വി പാറ്റും ചെന്നീർക്കര കേന്ദ്രീയ വിദ്യാലയത്തിലെ സ്‌ട്രോംഗ് റൂമിലേക്ക് മാറ്റി സീൽ ചെയ്തു. വോട്ടെണ്ണൽ കേന്ദ്രം കൂടിയായ സ്‌കൂളിലെ സ്‌ട്രോംഗ് റൂമിൽ നിന്ന് വോട്ടെണ്ണൽ ദിവസമായ ജൂൺ നാലിന് വോട്ടിംഗ് യന്ത്രങ്ങൾ പുറത്തെടുക്കും.1437 ബൂത്തുകളിലും ഉപയോഗിച്ച വോട്ടിംഗ് യന്ത്രങ്ങളും വിവി പാറ്റും അതത് നിയമസഭാ മണ്ഡലങ്ങളിൽ കേന്ദ്രീകരിച്ച ശേഷമാണ് രാത്രിയോടെ ചെന്നീർക്കരയിലേക്ക് മാറ്റിയത്. തുടർന്ന് രാഷ്ട്രീയ പാർട്ടികളുടെയും സ്ഥാനാർത്ഥികളുടെയും പ്രതിനിധികളുടെ സാന്നിദ്ധ്യത്തിൽ ജില്ലാ കളക്ടർ എസ്.പ്രേംകൃഷ്ണൻ, ജില്ലാ പൊലീസ് മേധാവി വി.അജിത്ത്, ഡെപ്യൂട്ടി കളക്ടർ സി.പത്മചന്ദ്രകുറുപ്പ് എന്നിവരുടെ നേതൃത്വത്തിൽ സീൽ ചെയ്യുകയായിരുന്നു.