കുളത്തൂപ്പുഴ :തിരുവനന്തപുരം - തെങ്കാശി അന്തർസംസ്ഥാന പാതയിൽ ഉൾപ്പെട്ട മലയോര ഹൈവേയിൽ ചോഴിയക്കോട് ഗുരു മന്ദിരത്തിന് സമീപം കാറും ബൈക്കും കൂട്ടിയിടിച്ച് യുവാവിന് ഗുരുതര പരിക്ക്.

കുളത്തുപ്പുഴ ആറ്റിനു കിഴക്കേക്കര വട്ടമല പുത്തൻ വീട്ടിൽ ഷിനോസിനാണ് അപകടത്തിൽ പരിക്കേറ്റത്.

കാലിന് ഗുരുതര പരിക്ക് പറ്റിയ ഷിനോസിനെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഹിറ്റാച്ചി ഓപ്പറേറ്ററായ ഷിനോസ് കഴിഞ്ഞദിവസം പുലർച്ചയോടെ ജോലിക്കായി പോകുന്ന സമയത്ത് തമിഴ്നാട് സ്വദേശികൾ സഞ്ചരിച്ച കാർ അമിത വേഗതയിൽ നിയന്ത്രണം വിട്ടു ബൈക്കിൽ വന്ന് ഇടിക്കുകയായിരുന്നു. ഇടിയുടെ ആഘാതത്തിൽ ഷിനോസിന്റെ ഇരു കാലുകൾക്കും ഗുരുതര പരിക്കേറ്റു.

നാട്ടുകാരുടെ സഹായത്തോടെയാണ് ഷിനോസിനെ ആശുപത്രിയിൽ എത്തിച്ചത്. കുളത്തുപ്പുഴ പൊലീസ് മേൽ നടപടികൾ സ്വീകരിച്ചു.