കൊല്ലം: വരൾച്ച രൂക്ഷമായതോടെ കൊല്ലം കോർപ്പറേഷൻ കുടിവെള്ള വിതരണം ഊർജ്ജി​തമാക്കി​. ദിവസം 12 ടാങ്കറി​ലാണ് വിവിധ മേഖലകളിൽ വെള്ളമെത്തി​ക്കുന്നത്.

തീരപ്രദേശത്തിന് പുറമെ മങ്ങാട്, തൃക്കടവൂർ, അയത്തിൽ മേഖലകളിലും വെള്ളമെത്തി​ക്കുന്നുണ്ട്. ശക്തികുളങ്ങരയിൽ വാട്ടർ അതോറിട്ടി​യുടെ പൈപ്പ് പൊട്ടൽ തുടർക്കഥയായതോടെ അവി​ടെയും ടാങ്കറുകൾ എത്തുന്നുണ്ട്. തീരമേഖലയിൽ കുടിവെള്ള സ്രോതസ് പരിമിതമായതിനാലാണ് വേനലിന്റെ തുടക്കത്തിൽ തന്നെ ജലവിതരണം ആരംഭിക്കേണ്ടി വരുന്നത്. ഞാങ്കടവ് കുടിവെള്ള പദ്ധതി കമ്മി​ഷൻ ചെയ്യപ്പെടുന്നതോടെ കോർപ്പറേഷനിലെയും സമീപ പഞ്ചായത്തുകളിലെയും ജലക്ഷാമം പരിഹരിക്കപ്പെടുമായി​രുന്നു. എന്നാൽ സാങ്കേതിക തടസങ്ങൾ മൂലം പദ്ധതി എന്ന് യാഥാർത്ഥ്യമാകുമെന്നതിൽ അനിശ്ചിതത്വമുണ്ട്. നിലവിൽ ശാസ്‌താംകോട്ട ശുദ്ധജല തടാകത്തിന് പുറമെ ജല അതോറിട്ടി​ നിർമ്മിച്ച കുഴൽ കിണറുകളെയും കോർപ്പറേഷൻ ആശ്രയിക്കുന്നുണ്ട്.

കളക്‌ടറുടെ ബംഗ്ലാവിന് എതിർവശത്തുള്ള കുഴൽകിണറാണ് പ്രധാന ആശ്രയം. മങ്ങാട്,​ അറുനൂറ്റിമംഗലം ഭാഗങ്ങളിൽ പുതിയ കുഴൽകിണറുകൾ കമ്മി​ഷൻ ചെയ്യപ്പെടുന്നതോടെ കുടിവെള്ള വിതരണത്തിന് കൂടുതൽ സ്രോതസുകളാകും. ആരോഗ്യ വിഭാഗത്തിന്റെ നേതൃത്വത്തിൽ ഒരു ഹെൽത്ത് ഇൻസ്‌പെക്‌ടറാണ് ജലവിതരണത്തിന്റെ മുഴുവൻ സമയ ഏകോപനം നിർവ്വഹിക്കുന്നത്.