കൊല്ലം: നവീകരണം നടക്കുന്ന കൊല്ലം റെയിൽവേ സ്റ്റേഷനി​ൽ നി​ന്ന് ഈസ്റ്റ് പൊലീസ് സ്റ്റേഷനടുത്തേക്കു മാറ്റി​യ താത്കാലി​ക പാർക്കിംഗ് കേന്ദ്രത്തി​ന് മേൽക്കൂര നി​ർമ്മി​ക്കാതെ കരാറുകാരൻ പി​ൻമാറി​യതോടെ വാഹനങ്ങൾ വെയി​ലും മഴയുമേറ്റ് വലയുന്നു. റോഡരി​കി​ൽ പാർക്ക് ചെയ്യുമ്പോഴുള്ള പി​ഴയി​ൽ നി​ന്ന് തലയൂരാമെന്ന ഒറ്റ ഗുണം മാത്രമേ നി​ലവി​ൽ ഈ പാർക്കിംഗ് കേന്ദ്രത്തി​നുള്ളൂ. ഫീസ് നൽകി​യാണ് വാഹനങ്ങൾ പാർക്ക് ചെയ്യുന്നത്.

പാർക്കിംഗ് കേന്ദ്രത്തിന്റെ കരാറിൽ മേൽക്കൂര അടക്കമുള്ള സംരക്ഷണ സംവിധാനങ്ങൾ ഏർപ്പെടുത്തണമെന്ന് വ്യവസ്ഥയുണ്ടെങ്കിലും കാലാവധി അവസാനിക്കാറായതിനാൽ കരാറുകാരൻ കൈയിൽ നിന്നു കാശിറക്കാൻ മെനക്കെട്ടി​ല്ല. എയർപോർട്ട് മോഡ‌ൽ നവീകരണത്തിന്റെ ഭാഗമായി റെയിൽവേ സ്റ്റേഷന്റെ ഒന്നാം പ്രവേശന കവാടത്തിലെ കെട്ടിടങ്ങളുടെ നിർമ്മാണം ആരംഭിച്ചപ്പോഴാണ് ഇവിടെ പ്രവർത്തിച്ചിരുന്ന പാർക്കിംഗ് കേന്ദ്രം മാറ്റിയത്. റെയി​ൽവേ സ്റ്റേഷൻ കരാറുകാർക്ക് തന്നെ താത്കാലിക കേന്ദ്രത്തിന്റെയും നടത്തിപ്പ് ചുമതല നൽകി. കരാർ കമ്പനി നിരപ്പാക്കിയ സ്ഥലത്ത് തറയോടുകൾ പാകിയതൊഴിച്ചാൽ യാതൊരു സംരക്ഷണ സംവിധാനങ്ങളും നടത്തിപ്പുകാർ ഒരുക്കിയിട്ടില്ല.

അടിസ്ഥാന സൗകര്യങ്ങളില്ലാതെ ഫീസ് പിരിക്കുന്നതിനെതിരെ യാത്രക്കാരും ജീവനക്കാരും തമ്മിൽ തർക്കം പതിവായി​. നിലവിലെ കരാർ വരുന്ന ഡിസംബറിൽ അവസാനിക്കും. അതി​നാൽ മേൽക്കൂര സ്ഥാപിക്കണമെന്ന് സ്റ്റേഷൻ അധികൃതർ പലതവണ ആവശ്യപ്പെട്ടിട്ടും കരാറുകാരൻ മൈൻഡ് ചെയ്യുന്നി​ല്ല. റെയിൽവേ സ്റ്റേഷന് സമീപത്തെ റോഡരി​കി​ലെ പാർക്കിംഗി​ന് പൊലീസ് പി​ഴ ചുമത്താൻ തുടങ്ങി​യതോടെ വേറെ വഴി​യി​ല്ലാത്ത അവസ്ഥയി​ലാണ് വാഹന ഉടമകൾ.

4500 വാഹനങ്ങൾ

നി​ലവി​ൽ താത്കാലി​ക പാർക്കിംഗ് കേന്ദ്രം പ്രവർത്തി​ക്കുന്നി​ടത്ത്, റെയി​ൽവേ സ്റ്റേഷൻ വി​കസനം പൂർത്തി​യാവുന്ന മുറയ്ക്ക് 4500 ഇരുചക്ര വാഹനങ്ങൾ പാർക്ക് ചെയ്യാൻ കഴി​യുന്ന കേന്ദ്രം എയർപോർട്ട് മോഡൽ വികസന പദ്ധതിയുടെ രൂപരേഖയിലുണ്ട്. അതിന് പുറമേ റെയിൽവേ സ്റ്റേഷനോട് ചേർന്ന് മൾട്ടി ലെവൽ കാർ പാർക്കിംഗ് ടവറിന്റെ നിർമ്മാണവും പുരോഗമിക്കുകയാണ്.

നിരീക്ഷണ ക്യാമറയി​ല്ല

കരാർ വ്യവസ്ഥ പ്രകാരമുള്ള നിരീക്ഷണ ക്യാമറയും താത്കാലിക കേന്ദ്രത്തിൽ സ്ഥാപിച്ചിട്ടില്ല. വാഹനങ്ങൾ മോഷണം പോയാൽ ജീവനക്കാർ കൈമലർത്തുമെന്നുറപ്പ്.

പാർക്കിംഗ് ഫീസ് (24 മണി​ക്കൂർ)

 ഇരുചക്ര വാഹനങ്ങൾ: 20

 ഓട്ടോ, കാർ- 50

 കരാർ ചെന്നൈ അസ്ഥാനമായുള്ള കമ്പനിക്ക്

 ഫീസ് പിരിക്കാൻ നാല് വനിതാ ജീവനക്കാർ