ചാത്തന്നൂർ: ചിറക്കര ഗ്രാമപഞ്ചായത്ത് ഏറം തെക്ക് വാർഡിലെ കൊച്ചുപാറ സെവൻത് ഡേ ചർച്ചിന് സമീപത്തു കൂടിയുള്ള ഓടനി​ർമ്മാണം വാർഡ് മെമ്പറുടെ നേതൃത്വത്തിൽ തടഞ്ഞു.

കല്ലുവാതുക്കൽ ജംഗ്ഷൻ മുതൽ ശീമാട്ടി ജംഗ്ഷൻ വരെയുള്ള ഓടയിൽ കൂടി വരുന്ന വെള്ളം ചർച്ചിന് സമീപം എത്തിച്ച് അവിടെ നിന്ന് സഞ്ചാരയോഗ്യമായ റോഡിലേക്ക് ഒഴുക്കിവിടുന്ന രീതിയിലാണ് നിലവിലെ നിർമ്മാണം. ഈ ഇടറോഡിൽ ഓട ഇല്ലാത്തതിനാൽ റോഡിലേക്ക് ഒഴുക്കിവിടുന്ന വെള്ളം സമീപ പ്രദേശത്തേക്കും വീടുകളിലേക്കും എത്തും. മഴക്കാലമായാൽ ഓടയിൽ കൂടി ധാരാളം വെള്ളം റോഡിലേക്ക് ഒഴുകിയെത്തും. ഇതോടെ റോഡി​ലൂടെ നടക്കാൻ പോലുമാവാത്ത അവസ്ഥയാകും. വർഷങ്ങൾ പഴക്കമുള്ള ഈ റോഡിൽ കൂടിയാണ് ഉളിയനാട്, കണ്ണേറ്റ പ്രദേശങ്ങളിലുള്ളവർ കല്ലുവാതുക്കൽ മാർക്കറ്റിലും മറ്റും പോകുന്നത്. എന്നാൽ ദേശീയപാത നിർമ്മാണത്തിന്റെ ഭാഗമായി​ സെവൻത് ഡേ ചർച്ചി ന് സമീപം നിലവിൽ റോഡ് അടച്ചിരിക്കുകയാണ്. ഈ ഭാഗത്ത് ദേശീയപാതയുടെ സർവീസ് റോഡ് വളരെ ഉയരത്തിലാണ്. സർവീസ് റോഡിലേക്ക് കടക്കാനുള്ള വഴിയും അടച്ചു.

ഇവിടെ ഉള്ളവർക്ക്‌ കല്ലുവാതുക്കലി​ലേക്ക് മുൻപ് 5 മിനിട്ട് കൊണ്ട് കാൽനടയായി എത്താമായി​രുന്നു. ഇപ്പോൾ 2 കിലോമീറ്റർ കടക്കണം. സർവീസ് റോഡിൽ നിന്ന് ഈ വഴി തുറന്നു നൽകാൻ സമീപവാസികൾ പഞ്ചായത്തിൽ പരാതി നൽകിയതിന്റെ അടിസ്ഥാനത്തിൽ ദേശീയപാത അതോറിട്ടി​ക്ക് ചിറക്കര ഗ്രാമപഞ്ചായത്ത് കത്ത് നൽകിയിട്ടുണ്ട്. എന്നാൽ ഇതുവരെ യാതൊരു നടപടിയും ഉണ്ടായി​ട്ടി​ല്ല.