അഞ്ചാലുംമൂട്: വേനൽ കനത്തതോടെ കുടിവെള്ളക്ഷാമം മൂലം ദുരിതത്തിലായി പുല്ലേരിൽ, വിരാലിയിൽ നിവാസികൾ. നൂറി​ലധി​കം കുടുംബങ്ങളാണ് വെള്ളം കിട്ടാതെ പ്രതിസന്ധിയിലായത്.

വേനൽ കനത്തതും ബൈപ്പാസിന്റെ നിർമ്മാണ പ്രവർത്തനങ്ങളുടെ ഭാഗമായി റോഡ് കുഴിച്ചതിനിടെ പൈപ്പ് പൊട്ടിയതുമാണ് കുടി​വെള്ളം ഇല്ലാതാക്കി​യത്. പൊട്ടിയ പൈപ്പി​ൽ വാട്ടർ അതോറിട്ടി​ അധികൃതർ അറ്റകുറ്റപ്പണി​ നടത്തി​യെങ്കി​ലും കഴിഞ്ഞ ദിവസം വീണ്ടും ബൈപ്പാസ് അധികൃതർ പൈപ്പ് പൊട്ടിച്ചു. ഈ പ്രദേശത്ത് ജലക്ഷാമം പരിഹരിക്കാൻ നിർമ്മിച്ച കുഴൽകിണർ പ്രവർത്തന ക്ഷമമല്ലാതായതോടെ കടവൂർ ആയൂർവേദ ആശുപത്രിക്ക് സമീപത്തെ കുഴൽകിണറിൽ നിന്നായിരുന്നു വെള്ളം പമ്പ് ചെയ്തി​രുന്നത്.

ഈ പൈപ്പ്‌ ലൈനാണ് ബൈപ്പാസിലെ നിർമ്മാണത്തി​നി​ടെ പൊട്ടുന്നത്. റോഡ് കുഴിക്കുന്നതും റോഡിൽ വലിയ മെഷീനുകൾ ഉപയോഗിച്ചു തീവ്ര മർദ്ദത്തിൽ കുഴിയെടുക്കുന്നതുമാണ് മണ്ണിനടയിലൂടെയുള്ള പൈപ്പുകൾ വേഗത്തിൽ പൊട്ടാൻ കാരണമെന്ന് വാട്ടർ അതോറിട്ടി​ അധികൃതർ പറയുന്നു. കഴിഞ്ഞ വേനൽക്കാലം മുതലാണ് പ്രദേശത്ത് കുടിവെള്ളക്ഷാമം രൂക്ഷമായത്.

നിലവിൽ വിലകൊടുത്ത് സ്വകാര്യ ടാങ്കറുകളിൽ നിന്നും ദൂരെ പ്രദേശങ്ങളിൽ നിന്നുമാണ് വീട്ടാവശ്യങ്ങൾക്കുള്ള വെള്ളം എത്തിക്കുന്നത്. കോർപ്പറേഷൻ ടാങ്കറിൽ നിന്നുള്ള വെള്ളവും ഈ ഭാഗത്ത് ലഭിക്കുന്നില്ലെന്ന് നാട്ടുകാർ പറഞ്ഞു. കുടിവെള്ളക്ഷാമം രൂക്ഷമായിട്ടും പരിഹരിക്കാൻ അധികൃതരുടെ ഭാഗത്ത് നിന്ന് നടപടി​ ഉണ്ടാവുന്നി​ല്ല.

ബൈപ്പാസി​ലെ റോഡ് പണിമൂലം പൈപ്പ് പൊട്ടുന്ന സാഹചര്യം ഒഴിവാക്കണം. എത്രയും വേഗം കുടിവെള്ള പ്രശ്‌നം പരിഹരിക്കണം

പ്രദേശവാസി​കൾ