പരവൂർ: ഇടവ, നടയറ, പരവൂർ കായലുകളിലായി 9 ബോട്ട് ജെട്ടികൾ സാമൂഹ്യ വിരുദ്ധരുടെയും തെരുവ് നായ്‌ക്കളുടെയും വിഹാര കേന്ദ്രങ്ങളായി നശിക്കുന്നു. കലയ്‌ക്കോട്, നെല്ലേറ്റിൽ, പീന്തൽമുക്ക്, കാപ്പിൽ,നേരുകടവ്, പൊഴിക്കര മഞ്ചേരി​യി​ൽ കടവുകളിലാണ് ലക്ഷങ്ങൾ മുടക്കി നിർമ്മിച്ച ബോട്ട് ജെട്ടികൾ കോട്ടപ്പുറം- കോവളം ജലപാതയിലെ നോക്കുകുത്തികളാവുന്നത്.

2015 ലാണ് ഈ ബോട്ട് ജെട്ടി​കൾ നിർമ്മിച്ചത്. കേരളത്തിന്റെ ജലഗതാഗത ഭൂപടത്തിൽ പ്രധാന സ്ഥാനമുള്ള കോട്ടപ്പുറം- കോവളം ജലപാതയുടെ ഭാഗമായി ഉൾനാടൻ ജലഗതാഗത വകുപ്പാണ് പാത നവീകരണത്തിനും ആഴം കൂട്ടലിനുമൊപ്പം ബോട്ട് ജെട്ടി​കൾ നിർമ്മിച്ചത്. പദ്ധതി ഉടൻ കമ്മി​ഷൻ ചെയ്യുമെന്നതി​ന്റെ അടി​സ്ഥാനത്തി​ൽ ബോട്ട് ജെട്ടികൾ സ്ഥാപിച്ചി​ട്ട് 9 വർഷം പിന്നിടുന്നു. ആദ്യം കരാർ അടിസ്ഥാനത്തിൽ യാത്രാ ബോട്ടുകൾ പരീക്ഷണ ഓട്ടം നടത്തിയപ്പോൾ നല്ല തിരക്ക് അനുഭവപ്പെട്ടെങ്കിലും ക്രമേണ ട്രിപ്പുകൾ നിലച്ചു. ചുറ്റും അരയാൾ പൊക്കത്തിലുള്ള വേലികൾ നശിച്ചു.

പരീക്ഷണ ഓട്ടം നടത്തി​യ കാലത്ത് ബോട്ടുകൾ കയർ തൊഴിലാളികൾക്ക് വലിയ ആശ്രയമായിരുന്നു. പീന്തൽമുക്ക് ഭാഗത്തെ ബോട്ട് ജെട്ടി ഒറ്റപ്പെട്ട ഇടത്തായതി​നാൽ ആരും തിരിഞ്ഞുനോക്കാത്തത് സാമൂഹ്യവിരുദ്ധർക്ക് സൗകര്യമായി​. പീന്തൽമുക്ക് പ്രദേശവാസി​കൾക്ക് റോഡ് മാർഗം പരവൂരെത്തുന്നത് 2 കിലോമീറ്ററും കാപ്പിൽ എത്തുന്നത് 3 കിലോമീറ്ററും ലാഭിക്കാൻ ബോട്ടുകൾ ആശ്രയമായി​രുന്നു. ഈ ഭാഗത്തുള്ള സ്‌കൂൾ കുട്ടികളും കയ‍ർ തൊഴിലാളികളും ഇപ്പോൾ ബസി​ലാണ് യാത്ര. കടത്തു വള്ളങ്ങളായി​രുന്നു പണ്ട് ആശ്രയം. ബോട്ട് ഓടിത്തുടങ്ങിയതോടെ കടത്തു വള്ളങ്ങളും നിലച്ചു.

..............................

ജലപാത പൂർത്തിയാകാൻ വർഷങ്ങളെടുക്കും. ബോട്ട് സർവ്വീസ് പുനരാംരംഭിച്ചു. നാട്ടുകാരുടെ യാത്രാ ദുരിതത്തിന് പരിഹാരമുണ്ടാക്കണം. വിനോദ സഞ്ചാരത്തിനും വലിയ സാദ്ധ്യതയുള്ളതാണ്

ഇടവ മമ്മൂട്ടി

ഐടി സംരംഭകൻ

...................

കോട്ടപ്പുറം- കോവളം ജലപാത, നവീകരണത്തിന്റെ അവസാന ഘട്ടത്തിലാണ്. ആഴംകൂട്ടലും പായൽ നീക്കവും പുരോഗമി​ക്കുന്നു. ആഴം കൂട്ടിയപ്പോൾ ഒറ്റപ്പെട്ട സ്ഥലങ്ങളിൽ കര ഇടിഞ്ഞതിനെ തുടർന്ന് സംരക്ഷണ ഭിത്തികൾ കെട്ടുന്നുണ്ട്. തീരത്തുള്ളവരെ ഒഴിപ്പിച്ചു പുനരധിവസിപ്പിക്കുക എന്ന ശ്രമകരമായ യത്നം പൂർണമായി വിജയിച്ചു. കമ്മി​ഷൻ ചെയ്യപ്പെടുന്നതോടെ ബോട്ട് ‌ജെട്ടികൾ പൂ‌ർവ്വ സ്ഥിതിയിലാകും

ഉൾനാടൻ ജലഗതാഗത വിഭാഗം ഉദ്യോഗസ്ഥർ