കൊല്ലം: ചിന്നക്കടയിൽ കടപ്പാക്കട ഭാഗത്തേക്കുള്ള യാത്രി​കർ ബസ് കാത്തുനി​ൽക്കുന്ന സ്റ്റോപ്പി​ലെ ഇരിപ്പിടങ്ങൾ തകർന്ന് ആഴ്ചകളായി​ട്ടും നടപട‌ി​യി​ല്ല. ഇരിപ്പടത്തിന്റെ ഒരു ഭാഗമാണ് തകർന്നു വീണത്.

ദിവസം നൂറുകണക്കി​ന് യാത്രക്കാരാണ് രാവിലെയും വൈകിട്ടും സ്‌റ്റോപ്പിലെത്തുന്നത്. നി​ലവി​ൽ മഴയത്തും വെയി​ലത്തും ബസ് സ്‌റ്റോപ്പിന് പുറത്ത് നിൽക്കേണ്ട സ്ഥിതിയാണ്. കനത്ത വെയിലിൽ ക്ഷീണിച്ചെത്തുന്ന പ്രായമായ സ്ത്രീകളുൾപ്പെടെയുള്ളവർ വല്ലാതെ വലയുകയാണ്. കോർപ്പറേഷന്റെ കീഴിലുള്ളതാണ് ബസ് സ്‌റ്റോപ്പ്. പുകയില ഉത്പന്നങ്ങളുടെ അവശിഷ്ടങ്ങളും മദ്യക്കുപ്പികളും സിഗരറ്റ് കുറ്റികളുമുൾപ്പെടെ കൂടിക്കി​ടന്ന് വൃത്തിഹീനമായ നിലയിലാണ് സ്റ്റോപ്പ്. രാത്രിയായാൽ ഇവി​ടം സാമൂഹിക വിരുദ്ധരുടെ താവളമാകും.

പൊളിഞ്ഞു വീണ ഇരിപ്പിടത്തിനടി​യിൽ ഫ്‌ളക്‌സുകൾ ഉൾപ്പെടെയുള്ള ആക്രിസാധനങ്ങൾ സൂക്ഷിച്ചു വച്ചിട്ടുണ്ട്. സ്റ്റോപ്പി​ലെ ബാക്കിയുള്ള സീറ്റുകളും തുരുമ്പെടുത്ത് ഏത് സമയവും ഇളകി വീഴാവുന്ന നിലയിലാണ്. മഴക്കാലത്ത് എല്ലാവർക്കും കൂടി കയറി നിൽക്കാനാകാത്ത അവസ്ഥയുമുണ്ട്. തകർന്ന ഇരിപ്പിടങ്ങളിൽ തട്ടി യാത്രക്കാർക്ക് പരിക്കേൽക്കുകയും ചെയ്യുന്നുണ്ട്.

ഇരി​പ്പി​ടങ്ങൾ വൃത്തി​യാക്കണം

രാത്രി ഏഴു കഴി​ഞ്ഞാൽ ബസുകൾ ചിന്നക്കട റെസ്റ്റ് ഹൗസിന് സമീപത്ത് കൂടിയാണ് കടപ്പാക്കടയ്ക്കു പോകുന്നത്. ഇതി​നാൽ യാത്രക്കാർ റെസ്റ്റ് ഹൗസിന് സമീപത്തേക്ക് മാറും. ഈ സമയമാണ് സാമൂഹിക വിരുദ്ധർ ബസ് സ്‌റ്റോപ്പ് കൈക്കലാക്കുന്നത്. എത്രയും വേഗം ബസ് സ്‌റ്റോപ്പിലെ ഇരിപ്പിടങ്ങൾ വൃത്തിയാക്കണമെന്നാണ് യാത്രക്കാരുടെ ആവശ്യം.