കൊല്ലം: എസ്.എൻ.ഡി.പി യോഗത്തിന്റെയും കേരളകൗമുദിയുടെയും സംയുക്താഭിമുഖ്യത്തിൽ ആലുവ സർവമത സമ്മേളന ശതാബ്ദി ആഘോഷവും പ്രതിഭകൾക്ക് ആദരവും നാളെ കൊല്ലത്ത് നടക്കും. യോഗം ആസ്ഥാനത്തെ ധ്യാന മന്ദിരത്തിൽ വൈകിട്ട് 3ന് നടക്കുന്ന സമ്മേളന യോഗം ജനറൽ സെക്രട്ടറി വെള്ളാപ്പള്ളി നടേശൻ ഉദ്ഘാടനം ചെയ്യും. ശിവഗിരി ധർമ്മസംഘം ട്രസ്റ്റ് ജനറൽ സെക്രട്ടറി സ്വാമി ശുഭാംഗാനന്ദ പ്രഭാഷണം നടത്തും. കൊല്ലം മേയർ പ്രസന്ന ഏണസ്റ്റ് അദ്ധ്യക്ഷയാകും. എസ്.എൻ ട്രസ്റ്റ് ട്രഷറർ ഡോ.ജി.ജയദേവൻ,യോഗം കൗൺസിലർ പി.സുന്ദരൻ,എസ്.എൻ ട്രസ്റ്റ് എക്സി. അംഗങ്ങളായ മോഹൻ ശങ്കർ,എ.സോമരാജൻ,എൻ.രാജേന്ദ്രൻ എന്നിവർ മുഖ്യാതിഥികളാകും.

വിവിധ മേഖലകളിൽ പ്രവർത്തനം കാഴ്ചവച്ചവർക്കുള്ള കേരള കൗമുദിയുടെ ആദരവ് ചടങ്ങിൽ വെള്ളാപ്പള്ളി നടേശൻ സമ്മാനിക്കും.സാമൂഹ്യ സാംസ്കാരിക രംഗങ്ങളിലെ പ്രമുഖരും ശ്രീനാരായണ പ്രസ്ഥാനങ്ങളുടെ ഭാരവാഹികളും ചടങ്ങിൽ പങ്കെടുക്കും.കേരള കൗമുദി റസിഡന്റ് എഡിറ്ററും കൊല്ലം യൂണിറ്റ് ചീഫുമായ എസ്.രാധാകൃഷ്ണൻ സ്വാഗതവും കൊല്ലം ബ്യൂറോ ചീഫ് ബി.ഉണ്ണിക്കണ്ണൻ നന്ദിയും പറയും.