കരുനാഗപ്പള്ളി: വായനയെ കൂടുതൽ ജനകീയമാക്കി വീണ്ടെടുക്കുവാൻ ഈ വർഷം 1000 വീട്ടക വായനാ സദസുകൾ സംഘടിപ്പിക്കുവാൻ കരുനാഗപ്പള്ളി താലൂക്ക് ലൈബ്രറി കൗൺസിൽ വാർഷിക പൊതുയോഗം തീരുമാനിച്ചു. ഓരോ ഗ്രന്ഥശാലാ പരിസരത്തുമുള്ള വീടുകൾ കേന്ദ്രീകരിച്ച് കുടുംബാംഗങ്ങളും പരിസരവാസികളും സുഹൃത്തുക്കളും ഉൾപ്പെടുന്ന വായനക്കൂട്ടം രൂപീകരിക്കുകയും അവിടെ പ്രതിമാസം പുസ്തകവായനയും ചർച്ചയും കലാപരിപാടികളും നടത്താനാണ് ലൈബ്രറി കൗൺസിൽ ലക്ഷ്യമിടുന്നത്. അംഗങ്ങളുടെ എഴുത്തിനെ പ്രോത്സാഹിപ്പിക്കും. 50 ശതമാനത്തിലധികം ഗ്രന്ഥശാലകൾക്ക് ഉയർന്ന ഗ്രേഡ് നേടാനുള്ള പദ്ധതി തയ്യാറാക്കും. എല്ലാ ഗ്രന്ഥശാലകളിലും ബാലവേദി, വനിതാവേദി, യുവജനവേദി പ്രവർത്തനം സജീവമാക്കും. ഡിജിറ്റൽ സാദ്ധ്യകൾ ഗ്രന്ഥശാലകളിൽ ഉപയോഗിക്കും. താലൂക്ക് പ്രസിഡന്റ് അഡ്വ. പി.ബി ശിവൻ അദ്ധ്യക്ഷനായ സംഗമം ജില്ലാ ലൈബ്രറി കൗൺസിൽ പ്രസിഡന്റ് കെ.ബി.മുരളീകൃഷ്ണൻ ഉദ്ഘാടനം ചെയ്തു. താലൂക്ക് സെക്രട്ടറി വി.വിജയകുമാർ 2023-24 വർഷത്തെ പ്രവർത്തന റിപ്പോർട്ടും വരവ് ചെലവ് കണക്കുകളും 2024- 25 വർഷത്തെ ബഡ്ജറ്റും അവതരിപ്പിച്ചു. ഡോ.വള്ളിക്കാവ് മോഹൻദാസ് ജില്ലാ പദ്ധതി രേഖയും വി.പി.ജയപ്രകാശ് മേനോൽ സംസ്ഥാന പദ്ധതികളും അവതരിപ്പിച്ചു. സ്റ്റേറ്റ് കൗൺസിൽ അംഗം എ.പ്രതീപ് സ്വാഗതവുംജില്ലാ പഞ്ചായത്തംഗം എസ്.സോമൻ നന്ദിയും പറഞ്ഞു. തിരഞ്ഞെടുക്കപ്പെട്ട 300 പ്രതിനിധികൾ വാർഷിക പൊതുയോഗത്തിൽ പങ്കെടുത്തു.