ശാസ്താംകോട്ട: സംസ്ഥാനത്തെ പോളിംഗ് സ്റ്റേഷനുകളിൽ സുരക്ഷാ ഡ്യൂട്ടിക്ക് നിയോഗിച്ച സ്പെഷ്യൽ പൊലീസ് ഓഫീസർമാരിൽ കൂടുതൽ പേർക്കും വോട്ട് ചെയ്യുവാനുള്ള അവസരം നിഷേധിച്ച നടപടിയിൽ കോൺഗ്രസ് ശാസ്താംകോട്ട ബ്ലോക്ക് പ്രസിഡന്റ് വൈ.ഷാജഹാൻ പ്രതിഷേധിച്ചു. പലരുടെയും കന്നി വോട്ടുകളായിരുന്നു നിഷേധിക്കപ്പെട്ടത്. എസ്.പി.സി, എൻ.സി.സി, എൻ.എസ്.എസ്, സിവിൽ ഡിഫൻസ് വോളണ്ടിയേഴ്സ് എന്നിവർക്കാണ് വോട്ട് നഷ്ടമായത്. ഇലക്ഷൻ നടത്തിപ്പ് ഉദ്യോഗസ്ഥരുടെയും സുരക്ഷാ ഉദ്യോഗസ്ഥരുടെയും അനാസ്ഥയാണ് ഇതിന് പിന്നിലെന്നും ആവശ്യമായ അന്വേഷണം നടത്തി അടിയന്തര പരിഹാരം കാണണമെന്നും വൈ.ഷാജഹാൻ ആവശ്യപ്പെട്ടു. ബൂത്തുകളിലെ കിടപ്പു രോഗികളുടെ വിവരങ്ങൾ കൃത്യമായി റിപ്പോർട്ട് ചെയ്യുന്നതിലും ബൂത്ത് ലെവൽ ഓഫീസർമാർ വീഴ്ച്ച വരുത്തിയതോടെ നിരവധി കിടപ്പു രോഗികൾക്കും വോട്ട് ചെയ്യാൻ കഴിഞ്ഞില്ല.