ആറ്റിങ്ങൽ: സമുദ്ര നിരപ്പിൽ നിന്ന് 2000 അടിയിലേറെയുള്ള കുന്നിൻ മുകളിൽ അടിസ്ഥാനസൗകര്യങ്ങളൊന്നുമില്ലാതെ കഴിയുന്ന തണ്ണിക്കോണം പച്ചക്കാട്ടിൽ എസ്.സി കോളനി നിവാസികൾക്ക് വാട്ടർ ടാങ്കുകൾ സമ്മാനിച്ച് ജില്ലാ ലീഗൽ സർവീസ് അതോറിട്ടി. അതോറിട്ടിയിലെ പാരാ ലീഗൽ വോളന്റിയർമാരുടെ നേതൃത്വത്തിൽ 3 കുടുംബങ്ങൾക്കാണ് 500 ലിറ്ററിന്റെ 3 വാട്ടർ ടാങ്കറുകൾ കൈമാറിയത്. ജില്ലാ ലീഗൽ സർവീസ് അതോറിട്ടി സെക്രട്ടറിയും സബ് ജ‍ഡ്ജുമായ എസ്.ഷംനാദ് ടാങ്കുകൾ വിതരണം ചെയ്തു. കുന്നിന് മുകളിൽ യാതൊരു സൗകര്യവുമില്ലാതെ നാല് കുടുംബങ്ങളാണ് കഴിയുന്നത്. ഇവിടെ വാസയോഗ്യമായ വീടുകളോ,കിണറോ,കക്കൂസോ ഇല്ല. ജലഅതോറിട്ടി പൈപ്പ് ലൈനും,ഭൂജല വകുപ്പ് കുഴൽകിണറും സ്ഥാപിക്കാനുള്ള നടപടി അന്തിമഘട്ടത്തിലാണ്.നഗരൂർ ഗ്രാമപഞ്ചായത്ത് എല്ലാ കുടുംബങ്ങൾക്കും കക്കൂസ് പണിയുന്നതിന് വേണ്ടി 30,000 രൂപ വീതം അനുവദിച്ചിരുന്നു.
പ്രവാസിയായ അനിത ഒരു ടാങ്കും, ചിറയിൻകീഴ് താലൂക്ക് ലീഗൽ സർവീസ് പാരാ ലീഗൽ വോളന്റിയർമാരുടെ നേതൃത്വത്തിൽ രണ്ട് ടാങ്കുകളുമാണ് നൽകിയത്. താലൂക്ക് പാരാ ലീഗൽ വോളന്റിയർമാരായ താഹിറ,വിദ്യ,സരിത,ശ്രീജ,മഞ്ചുഷ,മഞ്ചു,ശൈലജ, പ്രമീള,മോനിഷ,നഫീസത്ത്‌ ശ്യാമള,ഷൈല,രജനി,നിഷ എന്നിവരും പങ്കെടുത്തു.