തരുൺ മൂർത്തി ചിത്രം 14ന് ആരംഭിക്കും

മോഹൻലാൽ - പൃഥ്വിരാജ് ചിത്രം എമ്പുരാൻ തുടർ ചിത്രീകരണം ഏപ്രി ൽ 10ന് ചെന്നൈയിൽ ആരംഭിക്കും. ചെന്നൈ ഷെഡ്യൂളിൽ ആദ്യ ദിവസം തന്നെ മോഹൻലാൽ ജോയിൻ ചെയ്യും. രണ്ടാഴ്ച ചെന്നൈ ഷെഡ്യൂളിൽ മോഹൻലാൽ പങ്കെടുക്കുന്നുണ്ട്. എന്നാൽ, തരുൺമൂർത്തി സംവിധാനം ചെയ്യുന്ന ചിത്രത്തിൽ മോഹൻലാൽ ഏപ്രിൽ 14ന് ജോയിൻ ചെയ്യുന്നുണ്ട്. റാന്നി, തൊടുപുഴ എന്നിവിടങ്ങളാണ് തരുൺമൂർത്തി സിനിമയുടെ ലൊക്കേഷൻ. റാന്നിയിലെ ചിത്രീകരണത്തിനുശേഷം തൊടുപുഴയിലേക്ക് ഷിഫ്ട് ചെയ്യാനാണ് ഒരുങ്ങുന്നത്. തൊടുപുഴയാണ് ചിത്രത്തിന്റെ ഭൂരിഭാഗ ചിത്രീകരണവും.

മോഹൻലാലും തരുൺ മൂർത്തിയും ആദ്യമായി ഒന്നിക്കുന്ന ചിത്രത്തിലെ നായിക ആരെന്ന് അടുത്ത ദിവസം തീരുമാനിക്കും. വളരെ കുറച്ച് താരങ്ങൾ മാത്രമേയുള്ളൂ. മോഹൻലാൽ ടാക്സി ഡ്രൈവറുടെ വേഷമാണ് അവതരിപ്പിക്കുന്നത്. ഇക്കുറി മോഹൻലാലിന്റെ വിഷു തരുൺമൂർത്തി ചിത്രത്തിന്റെ ലൊക്കേഷനിലായിരിക്കും. അതേസമയം എമ്പുരാന് ചെന്നൈയിൽ ഒരു മാസത്തെ ചിത്രീകരണമാണ് പ്ളാൻ ചെയ്യുന്നത്.

മോഹൻലാൽ, പൃഥ്വിരാജ്, മഞ്ജുവാര്യർ തുടങ്ങിയ താരങ്ങൾ ചെന്നൈ ഷെഡ്യൂളിൽ ഉണ്ടാവും. 45 ദിവസം തിരുവനന്തപുരത്തും എമ്പുരാന്റെ ചിത്രീകരണം ഉണ്ടാവും. കൊച്ചിയിലും ചിത്രീകരണമുണ്ടാവും.ഇന്ദ്രജിത്ത്, സാനിയ അയ്യപ്പൻ തുടങ്ങിയവരാണ് മറ്റ് താരങ്ങൾ. യു.കെ ഷെഡ്യൂളിൽ ഇന്ദ്രജിത്തിന്റെയും ടൊവിനോ തോമസിന്റെയും രംഗങ്ങൾ ചിത്രീകരിച്ചിരുന്നു.