തിരുവനന്തപുരം:ലോക്സഭാ തിരഞ്ഞെടുപ്പിനായി ജില്ലയിൽ ഇന്നലെ ആറ് പേർ കൂടി നാമനിർദേശ പത്രിക സമർപ്പിച്ചു. തിരുവനന്തപുരം മണ്ഡലത്തിൽ രണ്ട് പേരും ആറ്റിങ്ങൽ നാല് പേരുമാണ് പത്രിക നൽകിയത്.

തിരുവനന്തപുരത്ത് ശശി തരൂർ , എസ്. രാജേന്ദ്രൻ (ബി.എസ്.പി) എന്നിവർ വരണാധികാരി കളക്ടർ ജെറോമിക് ജോർജിന് പത്രിക സമർപ്പിച്ചു.ശശി തരൂർ മൂന്ന് സെറ്റ് പത്രികയാണ് നൽകിയത്. മിനി.എസ് (എസ്.യു.സി.ഐ (കമ്മ്യൂണിസ്റ്റ്)) രണ്ടാമത്തെ സെറ്റ് പത്രികയും നൽകി. ഇതോടെ തിരുവനന്തപുരം ലോക്സഭാ മണ്ഡലത്തിൽ പത്രിക നൽകിയവരുടെ എണ്ണം ഒൻപത് ആയി. 15 നാമനിർദേശ പത്രികകളാണ് മണ്ഡലത്തിൽ ലഭിച്ചത്.

ആറ്റിങ്ങൽ ലോക്സഭാ മണ്ഡലത്തിൽ വി.ജോയ് (സി.പി.എം.),ഡമ്മിയായി അജയകുമാർ.സി,വിനോദ്.കെ (സ്വതന്ത്രൻ), സുരഭി.എസ് (ബഹുജൻ സമാജ് പാർട്ടി ) എന്നിവർ പത്രിക വരണാധികാരി അഡിഷണൽ ജില്ലാ മജിസ്‌ട്രേറ്റ് പ്രേംജി.സിക്ക് സമർപ്പിച്ചു.വി.ജോയി മൂന്ന് സെറ്റ് പത്രികയും സുരഭി.എസ് (ബഹുജൻ സമാജ് പാർട്ടി ) രണ്ട് സെറ്റ് പത്രികയും നൽകി. ആറ്റിങ്ങൽ ലോക്സഭാ മണ്ഡലത്തിൽ ഇതുവരെ ആറ് പേർ നാമനിർദേശ പത്രിക നൽകി.10 നാമനിർദേശ പത്രികകളാണ് മണ്ഡലത്തിൽ ലഭിച്ചത്.പത്രികാ സമർപ്പണത്തിനുള്ള അവസാന ദിവസമായ ഇന്ന് രാവിലെ 11 മുതൽ ഉച്ചയ്ക്ക് മൂന്ന് വരെ പത്രിക നൽകാം.നാളെ ആണ് സൂക്ഷ്മ പരിശോധന. ഏപ്രിൽ എട്ടാണ് പത്രിക പിൻവലിക്കുന്നതിനുള്ള അവസാന തീയതി.