വെള്ളറട: മലയോരത്ത് വാഹനപരിശോധന മുറപോലെ നടക്കുമ്പോഴും ഇരുചക്രവാഹന അപകടമരണങ്ങൾ പെരുകുന്നു. അമിത വേഗതയും മദ്യപിച്ചുകൊണ്ട് വാഹനം ഓടിക്കുന്നതും അപകട മരണങ്ങൾ വർദ്ധിക്കാൻ കാരണമായി. ഗ്രാമീണമേഖലയിൽ ഒട്ടുമിക്ക റോഡുകളും നല്ലനിലയിൽ നിർമ്മിച്ചതോടെ അമിത വേഗതയിലാണ് ഇരുചക്രവാഹനങ്ങൾ സഞ്ചരിക്കുന്നത്. മത്സര ബൈക്ക് ഓട്ടം ഗ്രാമങ്ങളിൽ പതിവ് കാഴ്ചയാണ്.ആഡംബര ബൈക്കുകൾ ഓടിക്കുന്ന യുവാക്കൾ ബൈക്കിന്റെ സ്റ്റാൻഡ് റോഡിൽ ഉരപ്പിച്ച് തീപ്പൊരി പാറിച്ചാണ് പായുന്നത്. അപകടങ്ങളിൽപ്പെടുന്ന വാഹനങ്ങൾ ഓടിക്കുന്നവർക്ക് ലൈസൻസോ വാഹനങ്ങൾക്ക് ഇൻഷ്വുറൻസോ രേഖകളോയില്ല. മിക്കപ്പോഴും മരണമടയുന്നവരുടെ കുടുംബത്തിന് ഇൻഷ്വറൻസ് പരിരക്ഷപോലും ലഭിക്കില്ല.

ഇരുചക്ര വാഹനങ്ങളുടെ അമിത വേഗത നിയന്ത്രിക്കുന്നതിനുളള സംവിധാനങ്ങളില്ലാത്തതും മദ്യപിച്ച് വാഹനം ഒടിക്കുന്നവർക്ക് കാര്യമായ ശിക്ഷ ലഭിക്കാത്തതുമാണ് അപകടങ്ങൾ വർദ്ധിക്കാൻ കാരണമെന്നും ബന്ധപ്പെട്ടവർ പറയുന്നു.